為了實現媽媽遺願，我成為了女兒國唐僧: 495

健：「聽落你就開心，無人睇住你實勁頹唔想溫書做功課，而且日日得自己一個人肯定好悶囉。」
康：「到時咪日日喺屋企打機囉，再唔係陪阿爽落去躝街都唔錯。」
健：「你都無躝街嘅基因，好難似得佢咁精彩。」
康：「唔試過點知，如果我屋企俾嘅話，直頭想搬埋去佢度住囉。」
健：「睇住佢躝街溝到女，然後踢你出門口等你唔好阻住佢扑嘢，到時唔好喊。」
我：「溝女呢啲嘢…唔一定係必然嘅。」
康：「係呢，你都單身咗好耐，做乜唔溝女嘅？」
我：「無目標，無機會，抖下先，讀書緊要啲。」
健：「你扮吖你…而家人哋水準高咗，要崇拜女神呀，睇唔起啲街邊女仔㗎喇。」
我：「無啲咁嘅事，我同Queenie普通同學嚟。」




健：「哈，我都無話邊個女神，你自己急住認。」
康：「點解我覺得Queenie同你越嚟越多嘢講嘅，好似佢俾你帶壞咗咁。」
我：「其實…個個女仔都係咁㗎啦，只要你撩得起佢，就會乜都同你講，如果唔係點會啲女仔一堆嗰陣講過無停口。」
健：「你以己度人，分明係你唔正常。」
康：「其實Queenie會同你謦啲乜㗎？」
我：「乜都會謦㗎…」
康：「有無啲刺激啲嘅話題？」
我：「有都唔同得你哋講啦…」
健：「叛徒！搵日要同你行刑至得！」
我：「咁大個人…咪攞啲竹籤嚟玩啦…」




健：「放心，等你食杯麪嗰日先嚟教訓你。」
黐線㗎！個個都小學雞，大家千祈唔好學，迫好同學盡快飲晒杯麪入面啲熱湯係一件好變態嘅事。
日子一日一日咁過去，我同QQ就一齊倒數。
雖然佢都係唔多開心，但知道只要捱多一個禮拜就可以返嚟我度住，心入面都係充滿盼望。
星期日，老竇煮完晚飯一齊食，我就準備食完嘢落去開工；原來老竇喺屋企放假，反而自己要去開工呢種感覺係多麼的奇妙。
爸：「呀爽，聽晚你要自己煮嘢食喇。」
我：「啊，點解嘅？爹地你約咗人？」
我自己整嘢食就當然無問題啦，因為我估我多數放學會去買燒臘飯或者去便利店食飽就算；自從爹地放假返咗嚟就餐餐都佢負責，名符其實嘅安坐家中休養生息，突然之間聽到佢話聽晚唔喺度，唔通佢係…去溝女？！