thriXt Qantasy 純文字安眠之作 (New: - U2K - 一直上架): 492

我呆咗咁望住佢。
我：「乜爹地…你識彈琴㗎？」
爸：「唔識喎，不過你駁得落電腦都實係攞嚟玩game㗎啦，係咪…Synthesia？」
我：「吓！點解你會知㗎？」
爸：「我哋廿四小時喺架船上面，你估真係由瞓醒就開工到上床咩，員工休息室入面好多嘢玩㗎，有時畀客玩啲嘢壞壞地就會搬入嚟自己用，去到外國又會落啲夜冷鋪執玩具；由Gameboy去到PS4，老虎機、波子機、彈珠台都一應俱全；簡單啲就啤牌、捉棋、魚蝦蟹、各式board game；甚至乎有唱K系統，連海關都無我哋咁齊嘅超級盜版電影硬碟庫；當然亦有各式樂器，重有人夾band添，keyboard呢啲小兒科啦。」
我：「呢份工…好似都幾好返咁。」
爸：「係㗎，又可以周圍去，係成日無得返屋企咁解。」佢望住我，都唔知佢想唔想見到我。
我：「咁個休息室…咪嘈到拆天，啲女同事頂得順你哋㗎嗱？」
爸：「唔使擔心，佢哋有自己嘅休息室，不過聽聞佢哋嗰邊其實重嘈。」
原來係咁…分開嘅，唔知爹地佢會唔會識到啲靚女同事呢？希望佢喺船上面唔會太dry啦…我喺度諗，如果我第時又行船，可能喺上面嘅餐廳做，或者Angel姐姐又喺上面做啤酒妹，而QQ就負責喺上面彈琴做live performance；到我哋一齊放工，可能兩個女人會一左一右煩住我，咁唯有左右逢源捉晒佢兩隻嘢偷偷走入客房，剝清晒佢哋光豬，展開一個激情四射熱辣辣嘅夜晚，重要擔心虛耗過度會搞到第二朝無精力開工。




中二病幻想時段完畢…都係打開隻game試下先。
我就開返QQ入落去嘅Canon，然後自己手忙腳亂咁跟住㩒制，第一次玩當然彈到七零八落。
但係，用QQ平時彈開嘅keyboard，玩佢入落去獨一無二嘅曲譜，呢種感覺非常之美好。
爸：「咁水皮嘅，等我又試一次啦。」
結果，差唔多彈啱九成…
我：「原來你真係識玩㗎…」
爸：「使乜講，平時無聊都會去㩒幾下，佢哋專登搵咗個34吋21:9嘅芒嚟玩，可以對到四個八度添…同埋，你媽咪…以前都會彈Canon。」
我：「吓，原來媽咪識彈琴㗎？」
爸：「嗯，但佢唔係好叻嗰啲，無專登去學，只係自己貪得意玩下啫，可以彈到啲好簡單嘅歌，不過你知啦，我哋屋企又唔係大，所以唔會放部琴喺度，所以你咪無聽過囉。」
聽完老竇咁講，我對QQ嘅好感度又再次即時直線上升；不過係唔會有用的，又唔係佢對我好感直線上升；QQ，我好掛住妳呀，雖然同妳只係分別咗幾個鐘。




玩咗一陣Synthesia，我都係返去揸貨櫃車，因為2070嘅畫面實在係太靚，令我愛不釋手；睇住架車係巴黎市入面嘅街道度行有如置身其中，好想可以同QQ一齊感受呢種迫真嘅感覺，當係眼睛去旅行都好吖。
爸：「我今日休息唔煮飯得唔得？出去食晚飯好唔好，有無乜嘢想食？」
我就當然無所謂啦，只要唔係用我嘅錢就乜都得…
我：「我有兩張大家樂鐵板餐十蚊券，睇下你有無興趣，折完都幾抵下。」
爸：「唔錯喎，邊度嚟㗎？」
我：「酒樓啲姐姐，唔知點解佢哋好多呢啲券。」