為了實現媽媽遺願，我成為了女兒國唐僧: 491

呢下…完全超出咗我嘅估計；我當然有預計過馬叔叔可能會話畀老竇聽，畢竟佢哋識咗咁多年唔會無聯絡方法；但由於佢一直都無向我問起過，所以我先入為主咁以為佢唔知道。
我：「原來…你一早知…」
爸：「係呀，嚟酒樓幫下手幾好吖，好過去麥當當砌麪包啦，不過，你好唔夠錢使咩？」
我：「唔…係呀，只不過…周末有時一個人喺屋企好悶，啲同學朋友又未必得閒，所以咪…搵啲嘢嚟做下囉，又當做學下嘢咁。」
爸：「但係馬神話你好似好想搵錢咁喎。」
我：「咁…都要表現得…有返啲熱誠，個樣好似好勤力…先會有人請㗎嘛。」
爸：「係媽咪叫你要搵啲細藝嚟搞下？」
我：「無呀，佢無特別提起…都係叫我溫書。」
爸：「咁要考到好成績就自然要溫書㗎啦，定係，你搵啲錢嚟使晒落啲無謂地方度呀？」
無呀…冤枉呀，我絕對唔係賺錢包養緊女人呀，更加唔會攞啲錢嚟玩PTGF，亦唔會攞嚟買原味底褲…而且，而且一定唔會攞嚟買草！




爸：「你唔會無聊到儲錢買3090呀？」
原來…佢嘅擔心只不過係啲咁無謂嘅嘢。
我：「傻㗎咩，係儲都儲3080Ti啦。」
爸：「真係識玩，唔理你，搵下錢都好嘅，不過唔好剩係攞晒嚟打機呀。」
我：「唔會嘅，放心…我都有溫書。」
今餐飯有老竇埋單，已經好耐無試過呢種咁爽嘅感覺，平時自己食嘢係要計到一個崩都唔可以畀多；呢餐我哋兩個人食咗六七個點心，再加多一碟雪菜火鴨絲炆米，馬叔叔再整多個芒果布甸畀我，我諗佢係純粹覺得今日都會賣剩所以提早等我享受唔使我今晚返工先攞嚟食。
佢哋兩個就當然會敘舊吹水，主要係講下香港發生咗啲乜事，呢個社會有幾多不知所謂嘅存在；我老竇又會分享下佢喺外地嘅所見所聞，包括咗啲黑社會點樣喺當地做生意，啲毒品大概賣緊幾錢，貧民窟啲居民點樣生活，上船玩啲有錢佬可以有幾洗腳唔抹腳，外國啲海關做嘢究竟有幾求祈同懶散，上船就呃飲呃食…
係幾有趣嘅，但對我一個細路仔嚟講，點都係食嘢最重要；唔知QQ今餐食咗乜呢？我就飽到上心口咁滯，好想可以同佢一齊share嚟食，希望佢唔會為咗慳錢而捱肚餓啦。
唔係喎，佢應該留肚今晚食窮佢條仔，都係懶得理佢。
食完晏就同爹地返屋企，我當然係第一時間，拆晒電腦啲線，攞螺絲批打開機箱，換卡…唔講喇，想學點換顯卡嘅小朋友自己去睇YouTube啦。換完顯卡就記住唔好咁快閂蓋，試下開唔開到機先…等咗一陣，好順利咁開到機，亦入到Windows；我打開咗平時成日玩嘅揸貨櫃車game，開晒一切效果，再將所有graphic settings推到去再高。




我：「好感動呀！我終於可以睇到最靚嘅畫面而唔窒格喇！啲樹好真呀！個湖啲水識反光㗎！」
爸：「咪揸車先啦…畀我彈下琴得唔得？」