為了實現媽媽遺願，我成為了女兒國唐僧: 484

Q：「我唔係傻嘅，你唔使咁擔心，我問咗瘟神可唔可以借個社務室嚟擺啲嘢，所以下晝我就會搬個喼返學校，咁樣如果我之後要攞嘢，都重可以喺返學嗰陣攞吖。」QQ一副奸笑計劃通咁嘅樣。
我：「哦，原來係有個傻仔獻殷勤。」
Q：「唔係囉，呢啲叫有效運用社會資源。」
我：「佢專登星期六返嚟學校服侍妳呀？」
Q：「唔知佢，我問咗佢琴日定今日，佢話今日好啲，同埋佢好似話有啲社務要做，乜嘢update校網入面紅社個page咁。」
我：「有無咁忙呀…知道有得見妳即刻仆返嚟咋掛，揀星期六重順便可以同妳拍下拖。」
Q：「無呀！我有男朋友㗎喇，點會同佢拍拖。」
我：「我無話佢係妳男朋友呀，不過人哋專登返嚟服侍妳，我就唔信妳好意思一放低個喼就拍拍囉柚走人囉，咁陪下陪下佢咯，咪變咗拍拖…」
Q：「喂，你咁講，即係我晚晚喺屋企同緊你拍拖啦，係唔係呀？」
我：「真係㗎？！咦，又好似係喎，聽落都唔錯，諗落嚴格嚟講真係咁樣。」




Q：「我都懶得同你癲呀，自己慢慢幻想打飛機啦，呢兩個禮拜我唔喺度睇住你記得要乖乖地，好好陪下爹地啦。」
我：「嗯…佢會日日由朝到晚喺度，唔使妳擔心，係呢，咁妳一陣搬完個喼…今晚…」
Q：「你唔使諗無謂嘢喇，我約咗男朋友拍拖。」
我：「嘩，妳都幾忙下咁喎。」
Q：「…」QQ一面不屑咁望住我。
我：「記住呀，晏晝唔好食得咁飽呀，如果唔係夜啲俾男朋友仔發現妳偷食就大檸樂喇。」
然後，佢開始露出一個會咬人嘅港女樣。
Q：「你好煩呀！有破壞無建設，唔該唔好喺度阻住我執嘢呀，我已經夠多嘢要煩！」
佢好似，真係有啲嬲嬲地咁。
我：「Queenie…對唔住…其實，只不過我喺度羨慕緊妳啫，又靚女，又受人歡迎。」




Q：「係㗎，如果我唔怕煩，又唔要面嘅話，搵多五六頭仔仔幫手養我都重得呀。」
我：「但咁樣…好似唔係幾好。」
Q：「所以我咪無咁做囉…你估我好想求瘟神幫我呀，我唔想畀假希望佢，佢對我越好，欠佢嘅越多我都唔知點還，我寧願佢係啲乜嘢變態仆街仔，同我講幫完我要揸波嗰啲，完事就無拖無欠。」
我：「妳估佢唔想咩…」
Q：「個個都想㗎啦，但唔會講出口吖嘛，佢越係扮到對我好，我就越係唔知應該點。」
我：「妳會唔會覺得佢係一個偽君子？」
Q：「唔知喎，我唔識define，個個溝女都係咁㗎啦，對個女仔好都係想得到佢咋嘛，唔通可以好清高咁話，我係無條件對妳好㗎，其實妳唔使考慮我㗎咁樣，定係一嚟就話會保証養我一世呀？做唔到就叫花花公子，偽君子？」
我：「咁我覺得佢都算正常嘅，係把口有時假咗啲啫，如果我係女仔，佢嚟搵我嘅話…睇怕都會受落。」
Q：「俾你做女仔重得了嘅，實變姣婆都似！」
使唔使咁話我喎…不過可能我以前受過Carmen影響太多，可能真係會覺得同男仔玩下無乜所謂，益下佢哋自己都開心；但女仔成日都講感覺，同埋緊張條仔係咪真心惜自己，唔知我又會唔會感受到？




我諗我無咁高尚，如果我有機會做到女仔，肯定第一時間玩到周地都係水先…