thriXt Qantasy 純文字安眠之作 (New: - U2K - 一直上架): 483

Q：「咁呢一次，都算係有啲作為嘅。」
我唔係傻仔，知道就算係淘寶訂呢啲衫一套都二三百蚊走唔甩，咁夾夾埋埋呢度都成三十件…好，窮不與富鬥，我都係出少啲聲算。
Q：「嘻嘻，係咪好靚呢？不過平時都無機會著，唔知攞嚟有乜用…但呢啲嘢又無理由留畀出年下一手表演啲女同學著。」
我：「好簡單啫，妳下年玩返啦啦隊咪得囉。」
Q：「啋，我先唔制呀，鬼死咁辛苦…不過呢，如果你第時有啲乜嘢重大貢獻，我都可以著畀你睇欣賞下嘅，呵呵。」
論收買人心，佢都算有一手，但其實佢可以乜都唔使做，我都會為佢鞠躬盡瘁，死而後已嘅…
我：「係呢，妳哋跳嗰首係乜歌嚟㗎？」
Q：「拎個YouTube嚟啦，係首好舊嘅歌嚟，可能你爹地都未出世添呀…呢度有首日本改編新版，有你好鍾意嘅日本妹妹仔，你慢慢睇啦。」
我：「呀，我想問埋藍社嗰首又係乜？」
Q：「哦，日本高中dance soc比賽嘅歌嚟，揀埋晒啲普通人無可能跳到嘅歌…點會贏吖…」




就係咁，我同佢兩個一齊迫喺部電腦前面睇MV聽歌，原來聽佢分享都係一件好開心嘅事。
如是者，又過咗兩日，嚟到星期六嘅朝早，我一起身就見到佢喺度執緊細軟，應該話我係俾佢嘈醒咗；當然啦，關於呢樣嘢我都一早慣。
我：「嗯…咁快就執嘢嗱？」
雖然唔關我事，亦都無能為力，但睇到佢要搬屋我嘅心情都有啲沉重。
Q：「我聽朝要走㗎喇，梗係今日要執好晒所有嘢啦，你最好幫我睇睇有無啲Bra呀，底底呀，攝咗喺一二邊，如果唔係到時俾你爹地發現咗就自己解釋啦。」
我：「如果真係咁…唯有同佢講係之前EX留咗喺度啦。」雖然大車車同細蚊都無留低過嘢喺度。
Q：「咁勇，唔驚你爹地鬧鬼死你呀？」
我：「佢…應該就唔會嘅，不過我就唔係幾想同佢講呢啲嘢嘞，不過呢，點都好過佢以為我有易服癖或者買學生妹原味底褲嚟打飛機嘅。」
Q：「嘩，你睇下你吖，一條底褲就可以諗到咁多嘢，你話你係咪變態吖？」
我：「有幾呀…個個男仔都鹹濕㗎啦。」




Q：「得，呢個我知道，唔使同我講。」
我：「嗯？妳做乜要分做兩堆嘅？」
Q：「咁我去十零日啫，費事成個喼攞過去阻住人哋屋企啦，我唔想俾兩個表妹白眼囉。」
我：「咁…妳留個喼喺度，我又可以點同爹地解釋？」就算我買個喼唔知做乜…都唔會貼滿Kuromi貼紙掛？雖然俾佢搞到而家幾鍾意呢隻惡魔兔。