為了實現媽媽遺願，我成為了女兒國唐僧: 485

我：「係呢…部keyboard妳唔諗住拎走呀？」
Q：「咪玩啦，咁大部入落喼我重放到其他嘢嘅？加埋我舅父屋企都有琴，我無理由攞過去。」
我：「妳啲表姐表妹…會唔會俾妳掂佢哋部琴呀？」
Q：「應該話，我喺佢哋屋企係唔會彈琴，佢哋兩個學咗好幾年都重係三四級，我去彈即係擺明要佢哋唔開心嘅啫，而且我都唔想教佢哋。」
唉…咁嘅氣氛又點會想住埋一齊喎。
我：「咁我屋企多咗部咁嘅嘢，點解釋好？」
Q：「有乜點解釋，你話你買嚟玩咪得。」
我：「無乜說服力喎，我就連小星星都唔識彈…」
Q：「得，畀十分鐘我，就教你彈小星星。」
我：「即係我要由朝到晚彈小星星扮學彈琴？」




Q：「教埋你彈有隻雀仔跌落水喇。」
我：「但…都係好唔make sense喎。」
Q：「哎呀，你咁驚青做乜，小朋友就不朽都會買埋晒啲唔make sense嘅嘢㗎啦。」
我：「咁我都唔想俾人話我買部垃圾放喺度嘛。」
Q：「咁，你話你買嚟打機咪得囉。」
我：「吓？呢部keyboard可以點打機呀？」
Q：「原來你唔知…過嚟啦，示範畀你睇。」
QQ將平時插電話條線掹走，換做一條插電腦嘅駁埋，再上網download咗一個叫synthesia嘅軟件，搞咗幾搞，然後電腦出到琴聲。
我：「嘩，乜呢個…咁似跳舞機或者guitar hero？」
同細龜玩嗰隻女團拍子機game都差唔多。




Q：「根本就係同一樣嘢嚟，用眼望住就識玩啦，內置就有小星星嗰啲低B歌㗎喇。」
我：「做乜唔早啲裝嚟畀我玩？」
Q：「我點知你有興趣，以為你剩係想做貨櫃車司機，無諗過你會想彈琴。」
我：「點同喎，揸貨櫃車溝唔到女，彈琴就得。」
Q：「你唔好咁多幻想啦，如果彈琴溝到女，李雲廸就唔使叫雞啦。」
我：「…，唔講呢樣，有無啲高B小小嘅歌？」
Q：「高B…要逐首逐首上網搵入落去，都幾煩下，呀，唔係喎，我可以即時彈入落去㗎喎。」
平時嘅game mode，係睇住啲音符跌落嚟，㩒返對應粒制；而QQ而家入咗錄譜mode，就係佢一路彈，啲音符會一路向天飛，都幾得意下。
我：「得天空之城同Canon？」雖然我係一個音樂白癡，但呢兩首嘢實在係太出名，如果咁都唔識實會俾QQ笑死。
Q：「重唔夠呀？兩首夠你玩一個月啦。」




我：「可唔可以加多首鬼滅嘅紅蓮華？」
Q：「你係咪喺度玩嘢呀？」
我：「唔通，女神妳唔識彈？」
佢聽到我咁講，就打開咗個YouTube，聽咗一次紅蓮華；然後又返返去個軟件度，彈咗一段簡單嘅紅蓮華琴譜。
我：「點解妳唔使譜都可以彈到嘅？」
Q：「如果要譜先可以彈到嘅話，嗰啲唔係叫識彈琴囉。」佢一面沾沾自喜咁講。
我：「咁…點解得十四粒制嘅？」
Q：「咪煩呀！多幾粒黑制你都玩唔掂啦，玩住先啦，你個芒又唔係特別大，用眼對位㩒兩個八度嘅闊度差唔多㗎喇。」