thriXt Qantasy 純文字安眠之作 (New: - U2K - 一直上架): 476

最後終於嚟到自己社嘅紅社喇，咦…點解套衫係之前無見過嘅？！Well…同之前嘅三隊唔同，呢套衫係比較偏向深色系，下半身係一條百摺短裙，外摺係閃紅寶石色，而內摺就係黑色；上半身呢，犀利咯，係一件非常貼身嘅閃閃衫，一邊係長袖，而另一邊就係斜落嚟全露膊，啱啱喺腋下封住咗個心口位，而條腰呢…係露肚臍嘅，色系係紅黑再間咗一兩條白間；無論點計都好，呢套戰衣係贏晒其他三社嘅，如果可以著喺QQ身上呢…就實在…
點知我望向中央看台嘅位置，除咗見到瘟神將枝社旗舉到有咁高得咁高之外；重有一個身穿啦啦隊服嘅女仔企咗上張凳上面，令到全場嘅所有人都可以見到佢，而呢個女仔…就係QQ。
我唔明，到底喺度搞緊乜？QQ明明同我講過今年唔會玩啦啦隊㗎喎，而且…佢喺嗰個位度做乜？
Q：「Girls of Red House！」
「We are READY！」
第一次，聽到佢原來可以嗌到咁大聲。
即係…搵佢做戰鼓？隨住音樂聲奏起，QQ舉起咗一枝紅色啦啦隊棒左右揮動，幅度亦都越嚟越大；呀！我明喇，佢係喺度指揮兼負責打拍子，就好似一部拍子機咁；你問我點解知呢樣嘢？因為我部電話俾佢強迫裝咗個拍子機app喺度，有時會俾佢徵用。
呢首歌係Toto Coelo嘅《Dracula’s Tango》，節拍感都係極之強而分明，甚至比啱啱嗰三首有過之而無不及，tempo比起《Material Girl》再快咗些少；啦啦隊嘅Intro分別採用咗橫排分解，再到直排分解，最後就係黑白色棋盤分解，主要都係一啲原位嘅基本動作嚟。
當歌聲開始嘅時候，隊員一邊揮動啦啦球，雙腳一邊走位，每個人都行得有條不紊，無話雞手鴨腳或者炒埋一碟，最後整隊form咗一個大嘅X形出嚟。
「Dracula la la I'm a sucker for your love, When you do do do what you do to me!」喺一整個十六拍入面，每一組八拍都係揮左平提腿，揮右平提腿，十字平提腿，最後接一個Y形大踢腿…我完全係睇到呆咗，我諗全場所有觀眾都係…完全無任何花巧嘢，就係將啦啦隊嘅提腿動作做到去極致，嗰種角度，嗰種拉伸，嗰種勁度可以話係近乎完美；成班女仔就好似一隊軍隊咁，嗰種整齊一致性可媲美肯肯舞同哥薩克舞；最後再加埋裙底春光條鮮紅色打底，我諗在場所有男仔都唔想再去分辨嗰條究竟係打底褲定係底褲…