為了實現媽媽遺願，我成為了女兒國唐僧: 475

綠社喺Bubble社長嘅帶領之下做咗一個非常唔錯嘅演出，比較短板嘅地方係呢首歌由頭到尾都係同一個beat pattern，有啲位會重複咗少少；另外就係無輪身高、身材、演出嚟講，Bubble都太鶴立雞群，搞到其他低form妹變晒綠葉，好嘅位係大家將注意力集中晒落Bubble度而唔為意其他妹嘅甩漏；缺點就係無咗啦啦隊女團應有嗰種千軍萬馬齊上齊落嘅感覺。
題外話由於社長本人落咗場，揸旗嘅責任就去咗應該係阿副社長度，佢搖來搖去興奮到成隻狗公咁。
Bubble師姐我都想妳贏呀，反正QQ又無落場。
（註：《Material Girl》曾被改編為廣東歌《200度》，主唱葉倩文；另香港玉女掌門人周慧敏亦曾灌錄原曲。）
第三隊演出嘅係藍社，佢哋嘅服裝係一條清爽嘅連身闊膊背心裙，上半part係白色，而下半part就係類似絲面爧身嘅鮮藍色，腰間度有幾條銀色呈V字型嘅分隔條紋，裙腳都有，而心口上面就有藍色嘅英文印花字。
佢哋所選嘅曲目係…荻野目洋子嘅《Dancing Hero》（ダンシング・ヒーロー）Up-Tempo Version，欸…點解QQ會知咁多嘢嘅…呢首係一首節奏感好強嘅歌，而且拍子都比之前嘅兩首更加快，由開波到尾都無停頓位；喺動作上面，佢哋嘅編排係更接近舞步多過啦啦隊動作。但係，由於呢首歌實在係太快，導致咗好多隊員嘅動作完成度好低，隻手都未伸直就要接落去下一個動作；加上呢套動作對體能嘅要求實在非常之高，過咗一分鐘之後已經好多人甩beat同skip動作，整齊度大打折扣；就好似跑四百米，一開始迫住用跑一百米嘅速度嚟起步，去到尾二百米已經墮晒皮咁。
總結嚟講，首歌係好好嘅，但係…我諗佢哋要再多加練習再特訓埋體能先可以有一個更好嘅演出。
（註：《Dancing Hero》原曲為Angie Gold嘅《Eat You Up》，曾改編為兩首廣東歌，分別係陳慧嫻嘅《跳舞街》同林志美嘅《勁之夜》，日文原曲近年因被登美丘高校舞蹈團選為參賽歌曲獲奬而再度大熱。）