thriXt Qantasy 純文字安眠之作 (New: - U2K - 一直上架): 477

當然，QQ所講過嘅劃圓動作，同埋雙人合體動作都做得非常出色；我敢講，呢場啦啦隊表演賽比起任何其他一個體育項目都更精彩萬分。開心嘅時間亦過得特別快，兩分鐘多少少眨眼間就完結，QQ嘅動作亦都隨音樂嘅淡出而靜止…
（註：本曲曾被改編成廣東歌，郭小霖嘅《小霖秘笈》，同埋近年喺日本改編成女子偶像團BEYOOOOONDS嘅《激辛LOVE》。恭喜大家，你哋終於捱完我嘅音樂環節《看白爛喵的音符》，如果唔鍾意嘅請盡插，因為我都唔諗住再寫，始終音樂唔係我嗰範，寫到嘔血咁滯。）
大約兩分鐘後，評判團已經得出結果，紅社第一，綠社第二，其他就算啦…而因為啦啦隊比賽呢五十分，紅社以廿幾分之微得到全場總冠軍！當瘟神一聽到賽果已經即刻攞埋枝社旗跑落去跑道上面，其他所有幹事連同埋QQ都尾隨。
我諗唔使講大家都可以估到，成大班紅社嘅人，包括好多攞咗金牌嘅高form生，重有啦啦隊，加埋忽然彈出嚟嘅紅社顧問老師，一齊繞場跑一圈；真係吖…超級戇㞗囉，而且…重超級青春添，或者有一日…我都會一齊咁跑，話晒呢過千分嘅總分入面，我好歹都貢獻咗大拿拿嘅八分！
陸運會快將結束，要癲嘅已經癲晒，而覺得事不關己嘅亦都已經執好包袱等放學；紅社堆傻仔傻妹跑完一圈之後，校長亦都急急腳咁頒埋個奬杯畀佢哋，免得自己要同呢班失控嘅大帝繼續糾纏落去。
另外，亦都係眾多班主任搵仔嘅時候，為嘅當然係影返一幅活動班相嚟留念；而啲中六生呢，當然已經自動自覺圍晒做一堆，今晚都應該唔使走㗎喇…
豬：「交叉仔，細龜，返學校再見喇，我過去先。」
講就咁講，但喺學校唔同班始終交流唔太多，我又唔似得好似Yvonne咁鍾意玩過家家。
我同細龜都落返去跑道搵阿Miss Tang，漸漸地我哋班啲人都聚返晒喺附近。
鄧：「Queenie！妳好靚女呀！」正一鹹濕Miss…




Q：「普普通通啦，係件衫影響啫…」
妳…好似唔係咁㗎喎，明明喺屋企妳係應該會話，「呵呵，我不朽都天生麗質難自棄㗎啦！」
德：「Miss Tang，妳係咪想影相呢？」
鄧：「係呀，幫我同呢位靚女影返幅相吖！」
呢個德爺真係禁撈到呀…我絕對懷疑佢係修練成影分身可以全場周圍飄。