為了實現媽媽遺願，我成為了女兒國唐僧: 474

（喵按：從來覺得推介音樂係最高難度嘅事，比推介文學更加艱辛，因為個人口味影響太重；之前嘅故都話可以用歌詞嚟襯托一下個Scene，呢度就真係得純音樂可言，如果閣下對音樂無興趣亦可以略略帶過就算，Link我唔貼喇，識嘅自會識，有heart去搵嘅自會搵；自問我嘅愛曲由Nessun Dorma聽到去Usseewa（うっせぇわ），演出就Les Misérables同Blue Man Group皆宜，絕對唔係啲乜追潮流或口味單一嘅傢伙，如果唔啱你口味嘅話都只可以講聲抱歉；你可以話我呢節係幾無謂下，因為現今呢個年代用筆嚟描寫呢啲多人音樂場景可算係極其愚蠢嘅事，就連考評局最終都屈服認同讀《聽陳蕾士的琴箏》甚為浪費人生而撤文，做成一篇範文可以無乜先生教又無乜例題嘅奇景（註：關於呢篇文網上嘅八掛其實非常多同精彩，亦有淫心淫術詮譯版…），所以呢…你哋咪當我呃字數囉，吹呀！）
抽中頭籤出場嘅係黃社，嗯…係喇，除咗鬥演出外，服裝都係其中一個對分數有影響嘅因素，黃色啦啦隊嘅服飾係類似網球或哥爾夫球僮，下身純色白色短裙，上身白色T恤外加一件鮮黃色背心，背心上印咗數目字同英文名，有啲似籃球背心咁，下面就黃色襪白鞋；感覺係想sale sporty同健康活潑，但確實無乜睇頭…
音樂徐徐響起，嗯…呢首係Yumiko鄭希怡嘅《舞吧！舞吧！》，欸…其實我對音樂一竅不通，都係QQ事後話返畀我聽先知；首先入耳嘅係出乎意料嘅一段芭蕾舞音樂，由前兩排嘅隊員做咗一啲傳統舞蹈嘅擺手、旋轉、換位動作，大約廿秒之後鏗鏘一聲曲調突然變成classic rock，動作亦都以迅雷不及掩耳之勢變成非常有勁度嘅啦啦隊揮手動作；可惜Yumiko嘅歌聲令到BGM嘅拍子無咁明顯，而嗰句「而相戀就等於連場熱舞」更加非常拖拍，搞到動作同音樂有少少甩軌嘅感覺，亦嚴重影響隊員動作嘅整齊性…兩分鐘完結，不過不失啦，稍嫌腿部動作太少，但呢首歌係幾好聽嘅。
接住上場嘅係綠社，即係由Bubble姐姐所帶領嘅啦啦隊演出；佢哋嘅衣著有啲似網球衫，白色百摺短裙，白色V領無袖衫，喺裙擺同V領上面有深淺綠色相間嘅條紋，心口位置就有條好似banner咁嘅實綠色印花，中間印咗啲黃白色嘅英文字；嗯，都幾青春幾fresh下，而Bubble姐姐無論著乜心口都係一樣咁好睇。
音樂甫響起就係明亮顯眼嘅節拍，呢首係Madonna嘅《Material Girl》（Extended Dance Remix），intro採用由外而內嘅漸長式動作，即係第一個四拍係得兩翼隊員活動，每過一個四拍就向內擴增一格，真至intro完結就全員一齊郁…
當聽到娜姐開口「Some boys kiss me, some boys hug me…」，作為center位嘅Bubble姐姐就彈咗出嚟花枝招展魅力四射…欸，或者我形容得有啲過態，始終Bubble佢唔係位列傳統女神嘅名冊，比較帶到出嚟嘅感覺係佢嘅動態美，每一下躍動都睇得出係擺咗全副心力入去。
去到「Cause we're living in a material world
And I am a material girl…」嘅快拍位，有一個側身單手觸地嘅動作，再接半側臥分腿大擺動轉向；聽唔明？唔緊要，即係坐喺地下對住觀眾席擘到隻腳大一大轉坐向盡show個髀罅同埋條綠色打底褲；相信有認真睇住呢一幕嘅雄性生物都會見到眼前條磚紅色嘅跑道被染成一片綠油油嘅草地，幻想自己係一個農夫，喺度屈膝彎腰準備插秧播種。
正所謂鋤禾日當午，汗滴禾下土…
言歸正傳，呢個動作係幾高難度亦都有美感，尤其係佢哋嘅對稱式安排令到整體畫面更加和諧。




不過呢兩句歌詞呢，我覺得套落QQ度就更加正，始終佢先係貨真價實嘅物質女孩…可惜吖，諗到要佢而家屈就同我一齊生活就不由得悲從中來…