thriXt Qantasy 純文字安眠之作 (New: - U2K - 一直上架): 473

唔係自己落場，其實感受唔到啲乜，所以我都無謂描述太多喇，以免爛作喵篇文成為咗陸運會作文嘅範文…哈！如果全篇口語都有人敢抄嘅話。
四百米，即係跑一個圈，大約一分鐘多啲就可以分勝負，最後QQ輸一兩個身位得咗個第四，就同佢當初嘅預想一樣，雖然攞唔到牌但都會有啲分。
接住落嚟就係欣賞一大堆嘅接力賽等放學。
學某言寫文一樣用一個完美嘅句號嚟了結今日。
然後羞澀地拖住女神，邊偷望美腿邊回家。
咪住先！咪住先！冷靜少少返返嚟，唔好去咗異世界俾暴力女周樂童打一鑊就唔抵，而且我重要喺度等接收QQ嘅三啖惜惜做禮物。
無錯，放學前要欣賞最後嘅一項比賽，就係啦啦隊決鬥，睇住一堆猶如無双小女兵嘅啦啦隊員喺度廝殺；嚟到呢度已經係陸運會嘅尾聲，全場鴉雀無聲屏息靜氣期待呢場春光明媚肉汁四濺嘅精彩演出。
其實有幾精彩呢？我都唔知，點解對上兩年無乜感覺嘅，可能當時嘅我喺度瞓緊覺或者打緊機。
最大問題係…點解我哋坐到咁高嘅，呢個位無乜嘢睇㗎咋喎，雖然啲關鍵位喺學校都已經睇過。
豬：「喂，不如坐落啲咯。」果然男仔都係性好此道…




其實唔止我哋，由於啦啦隊員已經落晒場準備表演，本身佢哋嘅區域空咗出嚟，一大堆學生就不斷向下湧，甚至係索性唔坐趴喺最出嗰條欄桿觀戰；另一邊廂，各社嘅幹事就已經塞晒去中央看台上面，由社長手持四色旗幟，準備指揮四社嘅殊死一戰。
跟住落嚟就由司儀簡介啦啦隊表演賽嘅賽制，首先由校長抽籤決定出場次序，然後每隊有兩分鐘時間配合音樂演出，再由老師以及校友嘉賓組成嘅專業評判團畀分排名，攞第一嘅有五十分，跟住嘅係三十分，二十分同十分；簡單嚟講，攞到第一就差唔多等於贏多三面金牌，都幾緊要下。
通常去到呢啲環節，就經常都會聽到一啲好老套嘅背景音樂，例如Queen樂隊嘅《We will rock you》，又或者係郭富城嘅《強》，又如果加埋個表演麻麻哋嘅話，聽住呢啲音樂都咪話唔尷尬。
唔知…佢哋今次表演會用啲乜音樂呢？由於平時佢哋放學練疊晒聲，放慢playspeed又分解晒，我都唔知佢哋播緊乜。