thriXt Qantasy 純文字安眠之作 (New: - U2K - 一直上架): 450

豬：「係妳發神經晏晝嗌小菜，係人都知有排等啦，邊有得怨㗎。」
U：「我想食乜就食乜，你理得我吖。」
豬：「喂！妳…妳！剩係潷晒啲粟米肉粒想點？」
U：「得啦，唔好煩，一陣畀返啲腩汁你。」
豬：「邊係咁計？！我啲汁入面有肉㗎！點同？」
U：「當然唔同啦，我食完有我嘅口水尾㗎，聽唔聽到我啲姐妹點講呀，今次益晒你呢隻肥豬喇。」
豬：「無人話想食妳啲口水尾，我亦都唔想聽妳話囉！」肥豬想搶返碟飯，Uranus一手攔住，喺唔敢亂咁掂女仔手嘅大前提下佢都束手無策。
U：「呵！唔係你想唔想聽我話，而係你一定要聽我話，係Miss問我班會個燒嘢食gathering搞成點，叫我好好督住你做嘢，你好同我呢個lunch決定晒邊個負責買嘢，今日之內要通知晒佢哋，同埋嗰日朝早要搵人去我爹地間鋪度攞牛扒豬扒。」
哦，原來又係太子女嚟，屋企做飲食生意？
都好正常嘅，屋企無返咁上下又點同另外三個女神做friend喎；不過呢，雖然佢哋四個都係豐衣足食嘅女仔，但出嚟嘅感覺又好唔同，就連食嘅嘢都好似各走東南西北咁。




話雖我一介平民，都想瞭解下啲女神嘅習性嘅，於是我就食住學生餐觀察佢哋嘅食相，整體嚟講都好配合返佢哋點嘅菜；Zilvla重好細心咁喺度用刀叉劏緊嗰兩隻大海蝦好似驚整爛隻蝦件衫咁…而食下食下，QQ隻腳竟然貼住咗我隻腳。
都唔知佢喺度諗乜，既然枱底嘅嘢無人睇到，所以我都唔縮喇，呢下係有小小飄飄然，彷彿有一陣撲面而來嘅幸福…而呢個時候個牛腩煲都到。
U：「嗱，畀返碟飯你。」
豬：「妳睇下…啲飯就無乜郁過，但啲餸就無咗一半，妳個女班長簡直欺人太甚！」
U：「豬係食呢啲㗎啦…咪咁多投訴，分多半碗飯畀你嘞，要肥肥白白先可愛，知唔知？」
豬：「唔要呀，我要餸呀，畀咁多飯我做乜？」
U：「你睇下人哋爽仔佢幾聽話，女神畀幾多飯佢都照食無誤，邊有好似你咁嫌三嫌四喎，又話自己生無可戀…嗱，淋返啲汁落去咪食得落囉，再送多嚿牛筋畀你嘞。」
豬：「女班長，妳係咪蝦我唔識嘢呀，呢嚿…點睇都係蘿蔔嚟㗎喎。」
U：「吓，有啲咁嘅事？太似樣喇，我唔識分，不過都差唔多啫，有得食你就食啦。」
呢個女班長U女神，係有啲嘢㗎喎，感覺上比較明刀明槍，應該幾好相處，係個好女仔嚟？