thriXt Qantasy 純文字安眠之作 (New: - U2K - 一直上架): 449

其他規例包括，宿營當然唔使諗，所有活動夜晚六點前要散場，除非有簽回條，班主任一定要出席看住班細路即係無償加班…不過我心諗呢啲指引其實無乜用，如果我夜晚約阿健打波得唔得？甚至游水呢？又或者一大班約去酒樓打邊爐，其實乜叫班會活動，成班人一齊食晚飯唔一定用班會名義嘅啫，不過我班好似無班會活動就係真嘅…話時話阿健都係班會打雜嚟，QQ就係文書。
U：「乜嘢叫水上活動呀？即係水上面呀！水側邊係唔計㗎，喺海邊行下影下相有乜問題喎，總之你同我諗掂佢呀，重要搵人早啲去霸靚位。」
呢啲感覺真係夠晒似曾相識…
Z：「唔使等我哋，你哋趁熱食先啦。」佢哋當中，Zilvia係最溫柔嘅一個，算唔算係最好嘅女神？
聽到佢咁講QQ同Yvonne都準備起筷。
Q：「你肚唔肚餓呀？」
我：「一早餓死咗，今朝食得唔多又跑完三千…」
Q：「如果我畀啲飯你你點睇？」
我：「好呀，我實食得晒㗎，兩份都得呀。」
Q：「但你晏晝重有比賽，得唔得㗎？」




我：「跑百一米應該無乜影響嘅，都係爆廿零三十秒啫，最多跑完先嚟肚痛，唔理得咁多…」
Q：「你係先好，唔好飽死郁唔到。」
QQ講完就將佢啲炒飯底潷過嚟我呢邊，咁唔止飯嘅，重有少少唔起眼嘅魷魚圈同無鬼謂蜆仔；其實我覺得學校陸運會係一個好唔人性化嘅活動嚟，係人都知道食完飯唔可以做劇烈運動，偏偏lunch time就係fix死嘅，嗰啲被迫死飽飽就要即刻跑嘅運動員實在係好無陰功…好在我係三點先比賽，應該重有少少時間消化。
Y：「嘩！娘娘派兵糧咁喎！」好一副食花生嘴面。
Q：「無呀，我一陣跑四百米唔食得咁多，費事太大嘥咋。」都唔知佢兩個係咪真係friend嚟…
Y：「阿爽，食完女神口水尾要聽人話呀，知唔知？」其實…就不朽都聽㗎啦。
我：「乜…邊係喎…」
Q：「我掂都未掂過碟飯呀，何來口水尾喎，妳咁想收兵就喂佢食口水尾啦。」
Y：「哎呀，我又點好意思同妳爭呢…雖然口水尾就無嘞，但係點解會有個餐包喺度㗎？阿爽你同我哽咗佢呀！」講完就用手搬咗個包上我碟飯度。
我：「我有嗌走餐包㗎…廚房慣咗手勢掛。」




俾佢哋兩個加完料，我個學生餐變咗成座山咁。
無所謂啦，我堅係肚餓，理得啲女神講乜廢話，所以就即刻開餐先，左手揸叉拮起個黑椒汁餐包放入口咬，再用右手攞羹加啲飯入去…
好快，Zilvia個沙律同碟乜春生無可戀飯都嚟埋，剩係爭個麻鬼煩柱候牛腩煲啫。
豬：「喂！做乜食我碟飯呀！還返畀我呀！」
U：「你快啲諗邊個負責買乜！諗完先有飯食。」
豬：「就算係都無理由食我碟飯㗎，黐線嘅咩？」
U：「跑完千五好肚餓呀，等咁耐都未嚟，借嚟食幾啖先啦，一陣還返啲畀你。」
我望住Uranus，覺得佢其實唔可以話係霸道，而係應該算叫做男仔頭性格；濃眉大眼，輪廓分明，加一頭厚實嘅長頭髮，好一副女中豪傑咁嘅外表。