thriXt Qantasy 純文字安眠之作 (New: - U2K - 一直上架): 451

Q：「嘩！你真係食得晒㗎？」
我：「我好肚餓吖嘛，跑完三千等到而家喇…」其實運動場係有小食部，但我望完個價錢牌就卻之唔會不恭嘅，畢竟一串魚蛋夠買一包公仔蝦餃畀QQ食咁滯，忍下都抵。
我：「你不如話對面嗰個，喊晒口咁滯咪又清晒啲飯。」U女神鐵石心腸，只係分咗兩嚿蘿蔔畀佢。
豬：「我只係生無可戀…化悲憤為食量…點解你哋班友要投我票做主席。」自古以嚟都係咁，主席同班長經常無人自願做，啲平時講嘢大大聲聲又曳唔晒嘅肥仔同高佬就會特別易遭殃，其他人為求自保都會心有靈犀咁投晒落佢哋度。
至於我…以前喺學校存在感太低，所以一直都安然度過。
U：「哈，跑完步又真係特別肚餓，我都食晒啲牛腩喇。」Uranus一邊撩住牙一路講。
其實我都好想食，聞到已經流晒口水，奈何自己…都唔係吖，有QQ分焗飯畀我食其實已經好幸福，係乜菜色都唔重要；又或者做飲食慣咗睇其他人食好嘢，次次倒走啲龍蝦殼嗰陣嘅感覺呢…好多時係會怪啲客做乜食剩伊麪。
Y：「妳個金牌…好似幾靚咁。」
U：「係呀，見金牌先敢當裝飾戴出嚟咋，失落咗一年今次終於可以攞返個金牌，嘻嘻！」佢一路講一路叉腰挺胸收腹，個奬牌就安放喺佢條乳溝入面…我誇張咗嘅，係著住PE衫嘅乳溝上面；Uranus都係一個心口有料之人，但可能因為佢骨架較闊嘅關係就無QQ前面咁明顯。
Z：「妳就好啦，好羨慕，妳頭先真係跑得好快。」




U：「多謝，一陣到妳哋表演，可能都有金牌呢。」
Q：「唔好講笑啦，邊有咁易喎，入到決賽就已經心足。」
俾著以前，我都會覺得佢哋啲對話好無聊，陸運會係玩下嘅啫，個牌又賣唔到錢；但認真落過一次場之後，先感受到比賽嘅氣氛，攞到金牌嘅人一定係付出咗好多其他人睇唔到嘅努力，就例如Uranus呢對咁有睇頭嘅腳；徑賽上面嘅每一秒，田賽上面嘅每一公分都實在得來不易，明明我差幾吋就…而阿健竟然可以因為追住我而跑到咁快，一切都好大衝擊；我嘅比賽重未完，推鉛球無可能啫，跨欄點都有少少掛？雖然第一次落場玩跨欄可以攞第一呢個諗法係好荒謬，但我已經決定咗要盡爆，如果攞到金牌我就可以送畀QQ，再換佢嘅香吻，唔知佢會唔會有feel呢，我想得到更加多，唔止係佢嘅肉體…
食完飯我哋一行七人行返運動場，明明四個靚女著住PE衫我都唔得閒望，只係諗緊一陣點樣可以大跳特跳，望到馬路邊條欄杆就有一躍而跨嘅衝動，我開始懷疑自己有啲黐線。