為了實現媽媽遺願，我成為了女兒國唐僧: 401

我：「夠未呀？過…百層喇喎…」
啱啱又上返到頂樓，已經跑咗幾個循環。
Q：「呼…呼…好啦，今日就到此為止啦。」
我：「妳真係唔講得少，成百層樓都咁輕鬆。」
Q：「使乜講，我以前去gym room一做就每次都一個鐘以上，差唔多無停過嗰隻。」
以前，我成日都會有個迷思，就係有錢人嘅小朋友係咪真係會乜都叻啲，又會靚仔靚女啲；識咗QQ之後先發覺好多時唔係錢嘅問題，而係佢哋真係好努力，返學已經勤力，重要去補習社同學琴，運動又要兼顧，平時亦都會花好多時間打理自己…雖然呢啲嘢其實都要錢，沖多次涼都要水費電費。
Q：「嘩，啱啱好日落喇，原來呢度個景都幾靚。」
我：「嗯，一百層來回，都跑咗四十幾分鐘。」
Q：「可以望到學校個天台，上面乜都無。」
我：「乜妳以前住喺低層嘅咩？」




喺我心目中，有錢人嘅居所都係高高在上，俯瞰眾生，唔通…佢以前係住獨立屋？
Q：「唔係呀，重高啲添，不過剩係望到個海，由細望到大嘅我就覺得好悶，呢度可以望到啲人行來行去好得意。」那門子得意…認真服咗佢。
我：「好喇，妳咁樣好易凍親，行返落去啦。」
Q：「唔制，我想睇埋個太陽落山先，重有少少。」
我：「咁等我幫你保下暖啦。」
美其名為保暖，實際上為揩油，佢呢身打扮，加埋個咁嘅景色，我忍唔住貼咗個身埋去，用手攬住佢個肚仔，等啲風唔好吹到入佢肚臍。
Q：「喂！你成身臭汗唔好黐埋嚟啦！」
我：「溝返妳啲香汗咪唔臭囉。」做完劇烈運動，攬住個靚女，個人迷迷糊糊，隨口噏當秘笈。
Q：「嗯…」佢嘅回應不置可否，但就無反抗。
我哋兩個…我都唔識講，我諗佢都答唔出；總係可以喺某啲特定條件之下就變得好親密，但就唔會講啲乜去打破呢種奇妙嘅平衡，而事後好快又會回復正常，唔會懷疑我哋之間係咪有啲乜嘢唔妥；我諗就算行埋落去，做埋…我哋可以變做SP，彷彿都係自然就會發生，但係我唔想咁對佢，我亦都知佢係好女仔，無理由要佢背叛男朋友。




或者根本係我一廂情願想維持佢女神嘅形象。