為了實現媽媽遺願，我成為了女兒國唐僧: 402

如果佢一開始就到處收兵，周圍拈花惹草，亂咁同男人搞關係，我諗我都唔會沉船，快快手食埋一份就算；但當我發現對方係一個好女仔，我唔知點解就自然會上心，想佢過得好，唔好做一個壞女孩；Angel係咁，細蚊都係咁…以前我就覺得細蚊係攞嚟用好方便，但而家我會希望佢識到一個對佢好嘅男仔，擺脫以前啲不知所謂嘅感情關係，可惜我唔識祈禱，希望神會幫佢啦。
Q：「原來呢度可以望到我條仔間屋企，重要係佢間房嘅方向。」佢用手指指俾我睇。
我：「妳好似琴日先拍完拖嚟，咁快掛住人？」
好奇怪嘅感覺，攬住人哋條女喺度講人哋…
Q：「無特別掛住，只係諗緊如果佢用望遠鏡望過嚟見到我哋就大鑊。」睇落成三四公里，邊有咁易喎。
我：「咁不如畀個望遠鏡妳，可能會見到佢同第二條女喺張床上面呢。」
Q：「噢…咁就可以分手講bye bye了。」
佢嘅回覆不溫不火，好似無乜傷心嘅感覺。
我：「吓，就係咁？唔使衝上去閹咗佢兼摑條女一巴咩？」就好似啲教壞細路嘅肥皂劇咁。
Q：「咪玩啦，無咁嘅心情，既然佢唔再愛我咪算囉，男人唔係都係花心㗎咩？我無信心由初中開始拍拖就可以一生一世囉，我唔信佢唔想玩，我又無可能係世界上最正嘅女人…」




我：「咁要搵個好過妳講真唔容易喎…」
Q：「唔一定要好過，對得耐會厭，新鮮好重要。」
我：「妳唔好咁瞭解男人得唔得…」
Q：「乜喎，係人都知啦，本本愛情小說都係差唔多，不過如果俾我發現佢背叛我，臨走前一定要敲返佢一筆先。」
我：「咁…我祝你好運。」我無講好運係佢唔會俾男朋友背叛吖，定係可以敲到一大筆，佢自己鍾意啦；我角度當然想佢變返單身，雖然唔見得我有機會…但起碼做好多嘢都可以名正言順先，非禮都非得心安理得吖嘛。
Q：「如果有望遠鏡唔知係咪真係睇到呢？」
我：「我諗天文望遠鏡嗰啲一定得。」
Q：「哈哈，可以得閒睇到自己失身嗰張床。」
我：「做乜無端端咁講…有乜好睇？」
Q：「無㗎，不過對女仔嚟講，失身嘅地方點都有啲紀念價值，但係如果分咗手，咁就無理由再上去嚕，如果用望遠鏡䚎下都會開心嘅，或者見到下一個瞓喺上面嘅女仔無自己咁靚都會開心啲。」




我：「嗯，我失身張床喺自己屋企，無呢個問題。」