為了實現媽媽遺願，我成為了女兒國唐僧: 391

我：「其實，跑步一個人都得啦，點解要我陪？」
健：「你都陪咗我報三千啦，唔好咁多聲氣。」
我：「我又唔係要攞牌，你俾Bubble姐姐色誘關我乜事喎，既然你幫佢跑不如叫佢同你練啦，上次人哋都認得你同你say hi。」
健：「乜鬼色誘…只係…難得有女仔搵我…你知我啦…唔識拒絕佢…所以咪應承…人哋大我兩年…點敢搵佢喎…敢就唔使好似而家咁…」
跑兩步就嗦晒大氣，唉，服咗佢。
我：「係你諗得太多啫，一齊跑步其實無乜嘢。」
健：「你呀…一齊攬攬惜惜都話無乜嘢…㗎啦，學唔到你呀…」
我：「又真係無乜嘢，如果個女仔肯嘅話。」
無錯吖，QQ對我做主動都係咁啦，明明就無嘢。
健：「重好講我…人哋講一句…你就報三樣…都黐鬼線…如果唔係知佢有仔…以為…有路添呀…」




我：「唓，報一樣同報三樣有乜分別喎，一係就一樣都唔報去到個場大覺瞓，既然都係咯。」
健：「咁講…又好似係…早知報三樣…等Bubble佢開心下…」
我：「冧人就冧人啦，你幫佢玩三樣，佢可能會興奮到畀對波你揸添呀。」
健：「黐線…我收返…你認真嘅稱讚…」
我：「好似重未截㗎喎，搵Bubble加多兩樣囉。」
健：「唔啦…咁樣好奇怪…我又唔係…真係咁鍾意玩…」
我：「如果佢話報晒三樣就畀你揸波呢？」
健：「報！一定報！乜鬼都可以玩！」
哈，一聽到衰嘢就氣都唔喘，重想否認自己係一個日日諗衰嘢嘅青春期男生，等我淋下冷水先…
我：「只可以隔住校服揸㗎咋喎。」




健：「咁…OK…唔好話揸…可以貼隻手上去都夠…」
我：「你嘅要求都幾低，可惜我唔係社長姐姐。」
健：「未掂過女人…係咁㗎啦…揸過同摸過…都差唔多啫…心理補完一下就得…」
講開呢樣嘢，第一次就硬係甜美啲嘅，我又諗返起我個EX2，明明無乜波，樣都係普普通通，但嗰陣放隻手上去搓真係興奮到不能自拔；唉，唔知佢而家過成點呢，如果我嗰陣處理得好少少，唔好咁猴擒，可能就可以同佢玩耐啲…咁或者，佢就會變成第二個細蚊，算，都係唔好諗。
健：「呼呼…跑咗幾遠呀…而家…呼呼…」
我：「先十分鐘多啲，我諗最多咪2400到。」
健：「好，下次再約…返屋企開飯先。」
唔通，我體能真係幾OK？可能以前真係躝街躝得太多，同其他小朋友玩捉伊人或者伏匿匿我都係鍾意跑住等人追，跑上井字型公屋，跑到上屋邨走廊個頂，跑到斜坡維修通道，跑到上停車場天台又匿返落地庫…好似無乜地方難到我。
只要再搵多啲小朋友同我玩007入子彈，我分分鐘可以練到，die hard，生死時速，職業特工隊咁，不過而家啲小朋友好似已經唔識玩呢啲嘢，個個跌晒落坑渠執玻璃…