thriXt Qantasy 純文字安眠之作 (New: - U2K - 一直上架): 390

健：「呢個我都明嘅，今餐都算無請你白食。」
我：「放心啦，以後你可能重有大把機會請我。」
健：「死仔包，都唔知係咪你喺度咒我成世無女。」
我：「無咁無聊囉，一餐半餐飯我又唔係畀唔起。」之前真係成問題，而家有工返好好多。
健：「不過我都係會維持返我嘅承諾，到我上到傳說就會同佢表白。」
我：「吓，即係自掘墳墓，搵塊板嚟撞咁喇喎。」
健：「唔係嘅，講過就算數要去做吖嘛，不過都無諗住有結果，但你放心啦，我盡量唔會嚇親佢，亦都唔會煩住佢，早啲衰咗都好嘅，等我疊埋心水唔好再抱有啲無謂嘅希望浪費時間，反正網友又唔會尷尬，又唔會有人知呢件事。」
如果佢知道咗真相，我諗佢會打死我，再嬲死QQ都似…
我：「小心連朋友都無得做呀。」
健：「又係你講嘅，如果咁樣就連朋友都無得做，咁佢都唔見得有幾好啫，明明佢收禮物都收得好開心，又無叫我唔好送。」




呢兩隻嘢，真係冤冤相報何時了。
我：「都係呀，目光放開啲，其實有好多女仔都好easy㗎咋，出去識多啲，可能大把散拖你拍。」
健：「唔好串我啦，你明知我識女仔唔叻嘅。」
我：「或者去到最後，都重可以用錢解決嘅。」
健：「食屎啦你，再講以後唔請你食飯呀！」
食完飯，球場其實未有咁快有人，呢個鐘數多數係啲父母帶住啲小朋友喺度跑跑跳跳，有時都會有啲小學生喺度踢下波；雖然嚴格上嚟講我哋都重係小朋友，但牛高馬大同佢哋一齊玩就一定會俾佢哋串大蝦細俾屎喂…
所以我同佢去中心打下乒乓波先，詳情skip。
到咗四點幾就蒲去球場踢波，詳情skip。
去到六點幾越嚟越多青年，包括啲遊手好閒嘅敗類…呀，其實我以前都差唔多，而我呢啲見慣世面嘅當然就無乜所謂。
我：「你係咪就開飯喇，等下一場起碼要半粒鐘喎，不如走人咯。」我重點係準備返工，同埋睇下QQ返嚟未要開飯畀佢食，時至今日我變咗一個負責開飯嘅小朋友。




健：「都係，咁走囉，不過，我想跑下先。」
我：「吓，啱啱重未跑夠呀？」
健：「個場咁細，跑得幾多，抖都抖咗一半啦。」
我：「做乜，無端端咁認真呀…」
健：「Kuromi講得啱，認真讀書好緊要，咁陸運會都係校園生活嘅一部份嚟。」
我：「喂，我講下啫，唔使突然上晒身咁喎，有啲嘢越執著就越得唔到，唔係認真就會溝到佢㗎。」
健：「唔關事，我唔係諗住溝女，只係真係覺得自己平時唔夠認真，好似太隨便。」
我：「都唔算吖…你成績又keep得住，身型都叫OK有做下運動，打機又有幹勁，睇落都幾平均。」
健：「我覺得，嗰啲係叫擅長同鍾意，而唔係認真，平時睇你一副頹樣咁，但頭先食飯同你謦欬，先知道你可以分析女仔分析得咁認真，我開始明白點解會有女仔睺你。」
我：「咪講笑啦，我㞗噏當秘笈㗎咋。」




健：「係鬼，係力不到不為財，唔請你食飯都氹唔到你認真講嘢。」
我：「真係無囉…可能我擅長啫。」
事實上係如果我唔認真幫QQ拆局嘅話就會變成我哋嘅麻煩，既然QQ set好咗炮台，我梗係要幫佢射埋出去啦，點鬼知搞到條友神打上身咁。
健：「重衰！聽到就想揼你，跑啦！」