為了實現媽媽遺願，我成為了女兒國唐僧: 389

健：「吓？唔係呀化，佢又搵返你同佢玩埋啲變態嘢呀？」
我擰擰頭答佢：「唔係呀，佢準備緊DSE好辛苦，我畀啲支持佢咋，祝福佢考到好成績。」
健：「其實，你重有無鍾意人哋㗎？」
我：「鍾意有好多種，佢會一直喺我心度，永遠都咁鍾意佢，嘻嘻。」
健：「真係服咗你，咁我而家應該做啲乜。」
我：「點解你咁鍾意Kuromi，但又唔聽佢話，做一個專心讀書嘅好學生呢？」
健：「我都唔係好差啫，重好意思話我，你自己又點呀？」本來俾我帶佢遊花園搞到死魚口面咁嘅佢，有返少少生氣，佢係有啲小聰明嘅，對住我講讀書係佢少有可以自豪嘅時間。
我：「之前咪同你講我諗通咗，以後勤力啲囉。」
健：「曳完之後就扮乖，發財立品，真係唔夠你玩。」
我：「唔好咁講啦，其實我都有為我曾經傷害細蚊而後悔㗎，好在佢而家無乜嘢，所以有女都唔一定會開心㗎。」




健：「得喇，最多以後唔笑你戴帽囉…見你食碟炒意食得咁開心，重有乜嘢建議畀到我呀？」
我：「咁呀，再畀多啲心機讀書囉。」
健：「妖，有無第二句呀，即係叫我唔好諗女嘅嘢啫，睇到你而家咁嘅款真係好唔慣。」
我：「非也，Kuromi咁講，可以話係一道謎題嚟，即係佢好重視學業，咁佢睇得上嘅男仔，都一定係一個讀書叻嘅人，你要自己有機會，睇怕就要繼續死鋤書先得，書中自有黃金…呀唔係，係顏如玉至啱，are you understand？」
確實，我係俾Queenie影響咗，重要好深下，幾個月前嘅我重係喺度日日抱怨細蚊背叛我，絕對唔會想像到我把口會講到句咁嘅嘢出嚟。
健：「屌！係do you understand呀，對住你都唔知真係笑好定喊好。」
我：「嗯，多謝你更正，重有就係欲速則不達，建議你唔好日日諗住Kuromi，可能機會就會出現喺眼前㗎嘞。」
健：「即係點呀，等個天跌落嚟畀我咁？」
我：「你估好出奇呀，有可能謦謦下讀書啲嘢佢會約你出嚟一齊溫呢，又或者佢俾人hurt完就會想你出嚟安慰佢㗎喇。」
健：「喂喂喂，一齊溫書OK，但點解我要等佢俾個衰男仔hurt完我先可以安慰佢呢？」




我：「有啲嘢無解㗎，唔好死牛一邊頸啦，如果唔係Carmen失戀，我又點會識到佢呢，如果唔係細蚊黐著嗰條仆街，我又何來機會同佢和好呢，好多嘢係你控制唔到，要嚟就會嚟㗎喇。」