為了實現媽媽遺願，我成為了女兒國唐僧: 388

我：「咁，Kuromi重有無同你講乜？」
健：「欸，都有嘅，話咁細個應該專心讀書…啲男仔實係諗埋啲衰嘢先想拍拖，乜嘢見人拖住個女仔自己又想，邊識照顧女仔。」
我：「佢講得無錯喎，好似…你都係一份子嚟。」
健：「吓，做乜咁話我…起碼我無狂send message煩住佢，亦都唔會發神經無端端表白嚇到佢花容失色。」你估你唔想？唔敢啫。
我：「咁，你話我知鍾意佢啲乜？」
健：「呢層…呢層呢…」
我：「就係因為個Kuromi頭像？」一嘢將死佢。
健：「雖然…但，我真係對個頭像好有信心㗎！」
我：「Well，即係任何一個用Kuromi頭像嘅女仔都得啦，係咪？」
健：「唔可以咁講㗎，睇佢打機啲手法，聽佢講嘢，都係有紋有路，感覺到係好女仔嚟。」




咪就係好到隨時可以玩死你嗰啲。
我：「咁如果畀你同佢拍拖，你認為可以點？」
健：「可以…嗯…一齊行下街，食下嘢掛。」
我：「行街，食飯，呢啲你搵個女同學做friend都可以做到啦，好明顯你就唔知拍拖應該點。」
健：「咁係人都有第一次㗎啦，無人一出世就識，唔識咪學到識。」
我：「你認為有無女仔會想你搵佢做白老鼠？」
健：「咁點解！你可以識到Carmen，又有細蚊送上門，乜嘢第一次都可以享受晒？」
我：「嗱嗱嗱！無講錯呀，人有我有，都未知自己想點就想拍拖，中晒呀。」
我發覺QQ呢幾句真係無敵，好難有邊條仔唔俾佢嚇窒，只要我打蛇隨棍上就可以制止呢條麻煩友做傻事。
健：「我起碼唔會好似你咁衰囉。」




我：「係，我認衰，所以你睇到啦，我而家咪又係無女，係唔係？唔健康嘅感情最後都會失敗。」
健：「咁點解你咁衰細蚊都會理返你㗎，可惡…我真係想試下嘛，就算最後失敗都有經歷吖。」
我：「即係想拍散拖啦？我諗Kuromi呢種女仔絕對唔會考慮囉。」
健：「嗚嗚，你個死人頭，我都好想抱住個女仔呀，明明你咁衰就乜都有，點解我…」
我：「重話唔係諗衰嘢…」
健：「抱都叫衰？又無話要做跟住落嚟嗰啲嘢…你唔好話掂都唔得，乜女仔唔係都鍾意俾人抱嘅咩，話乜感受到男仔嘅溫暖，好浪漫之類…」
我：「你唔好睇咁多偶像劇啦，如果個女仔好恨拍拖自己送上門咪係囉，有啲女仔的確係好需要愛情，又或者你好吸引搞到啲女仔發花癲囉，唔係嘅話通常都係覺得你有不軌企圖，呀，唔爭在同你講埋，我前幾日先同Carmen抱抱完。」