為了實現媽媽遺願，我成為了女兒國唐僧: 349

聽到Carmen咁講，我再忍唔住，一嘢攬住咗佢，Carmen係幾高下㗎，同我差唔多，但我呢個小朋友就會專登縮低個人，用個頭偎落佢脹卜卜嘅心口度，但今次唔係想揩佢油，只係想感受佢嘅心意。
C：「喂呀，你做乜呀…」我一嘢撲埋去。
我：「鍾意大卡車！」
C：「唉…正一死仔包。」架車摸摸我個頭。
我就係咁樣安靜攬住佢，我都唔知道想要邊種鍾意，但就算佢唔係我女朋友…無論當佢係炮友，朋友，家姐，定係所謂嘅大家姐，我都一樣咁鍾意佢，有佢喺身邊我就會覺得好安樂。
C：「好喇，夠喇，唔好搞到我鍾意咗你。」
我：「點解唔可以鍾意我。」
C：「唔好誤會，我只係唔想你搞到自己七國咁亂，我重要專心溫書唔得閒同你玩住，而你個女神重喺你屋企等緊你包M巾救命㗎。」
我：「我都知…即係，都係唔鍾意我。」
C：「到你考完DSE，如果你重係單身，咪試下搵我睇下我show唔show你囉，到時再答你。」呢個姐姐真係鬼馬到…即係如果到時我OK就再翻撻；都啱嘅，留多條後路畀自己係實無死。




我：「到時你係咪差唔多大學畢業喇？」
C：「入到先算啦！所以你唔可以阻住我溫書。」
我：「放心啦，幫妳做完排毒手術，妳可以心無雜念喇，唔使再諗住塊面心掛掛。」
C：「哈，都係嘅…咁，我要返上去先喇。」
我：「嗯，妳要畀心機讀書，考個好成績返嚟，要過得開開心心呀，知唔知。」
C：「乖喇，惜啖先。」
就同上次佢幫我包紮完一樣，又送咗個香吻畀我；或者同女仔惜惜根本就唔算得係啲乜，亦唔需要用乜關係做前提，反正QQ都會惜我。
真係好想，成世都俾姐姐照顧。
但又好想，可以擄獲QQ妹妹嘅芳心，真矛盾。
我：「等妳大學畢業呀，到時實搵妳！」




C：「就放長雙眼睇下你條仆街重記唔記得我。」
我：「畢業要搵份高薪厚職，我再俾妳包起啦。」
C：「食屎啦你，考完DSE要搵日嚟教訓你至得。」
我：「乜都玩得，係唔玩屎，唔準叫我食。」
C：「死返去搵你個Queenie呀，走喇，bye bye。」
我：「Bye bye大卡車！」
就係咁樣睇住佢入咗棟樓嘅大閘，其實佢同我係乜關係唔係咁重要啫，同佢一齊好舒服，睇住佢開心就已經好夠，而我，都要畀心機讀書。