為了實現媽媽遺願，我成為了女兒國唐僧: 342

C：「滿意未呀，死仔包？」
我：「好…好大呀…」我諗我嘅表情就同佢當年第一次喺我面前解開個Bra嗰陣一樣，雖然都feel都係好大下，但出面睇嘅大，同入面嗰粒嘅大畀到我嘅衝擊又係唔同嘅感覺。
C：「咪笑我啦，你估我想嘅咩，晚晚都要溫書，睇返晒以前中四五啲嘢，差唔多無一日瞓多過六粒鐘，咪搞成咁囉。」
我：「睇嚟真係好慘下。」
C：「無計啦，如果有個有錢仔肯要我就好，我都唔使佢對我一心一意，偷食唔好俾我知道，肯養我一世就得，我即刻唔讀書添呀。」
我：「妳都幾鬼現實㗎喎。」
C：「咁係吖嘛，乜你覺得日日返學讀書，返工搵錢好好玩咩，係人都想優哉游哉過日子㗎啦。」
我：「咁…有時返學，或者返工，都會遇到啲開心嘅事，識到啲有意思嘅人。」
我會諗，其實躝街都攰㗎，不過就識到Carmen；而返工雖然有時辛苦，但就有錢收，重俾我識到Angel；如果我乜都唔做，日日匿喺屋企，我就可能永遠自己一個人，咁最終都係要搵啲嘢做下。
C：「咁又唔係要懶到做隱蔽青年嘅，只係唔想辛苦，想學啲自己鍾意嘅嘢，做啲有興趣嘅事，例如同幾個女仔friend夾份喺海灘邊租間藍白色嘅小屋開cafe，每個人負責唔同嘅食物，輪流返工一個禮拜淨係返三日，返工就同啲嚟滑浪嘅靚仔打牙骹，喂下佢哋食焦糖布甸，咁就幾好。」




佢…係咪睇得日本漫畫同台劇太多，呢啲setting喺香港係無可能生存到，除非有個有錢仔直接買間海邊小屋畀佢哋慢慢蝕。
我：「如果間cafe有特別服務售賣，靠妳著住三點式拉客，都可能做得住嘅…」
C：「喂！唔好污染我嘅夢想呀，當我檳榔妹咩？」
我：「呢度香港嚟㗎…飲食唔做到死係交唔起租…」令我諗返起南丫島排晒隊嘅無謂雞蛋仔。
C：「鬼唔知咩…所以我咪要讀書囉。」
喺呢個功利嘅城市，無論你讀唔讀書都好，太多幻想只會令你更加絕望；睇住Angel我就明，唔好諗太多，落手落腳去做，呢個就係喺度生存嘅法則…正所謂希望越大，失望就…
我：「話時話，個男仔對妳唔係一心一意都OK？」
C：「哈，只限佢係有錢仔重肯養我一世咋。」
我：「咁同交易有乜分別？」
C：「無㗎，有時感情都係一種交易嚟，最緊要大家開心啫；不過呢，有時我覺得女仔…包括自己都會有啲花心㗎，咁我又點可以控制要一個男人絕對專一呢，都唔合邏輯。」




我：「咁妳會唔會搵到個有錢仔呀？」
C：「傻瓜，真嘅有錢仔想養邊個就養邊個啦，我何德何能要佢留喺我身邊呢，送上門畀佢哋食就易，玩得妳幾次佢哋都厭啦，至於嗰啲扮有錢嘅就送畀我都唔要呀，所以都係唔好發咁多夢，專心啲讀書就啱㗎喇。」