為了實現媽媽遺願，我成為了女兒國唐僧: 335

蛋卷鳳凰卷買一送一，每樣一盒啱啱好！
賀年金幣，嘉頓利是糖十蚊一大包…無視！
朱古力就…算啦，重有兩隻Zaini蛋喺屋企，日日對住個靚女已經甜到漏，唔使再食甜嘢。唔係喎，花街朱古力跳樓價三十九個九…算，唔忍你，就買返去食到今年聖誕節嚟賀一賀佢。
之後係例牌嘅東東雲吞王，紀文獅子狗，窮人嘅救命稻草六蚊一大嚿椰菜；再過去佳寶執兩枝zero，凍肉鋪五十五蚊兩包日本急凍烏冬。
嘩，咁就重到阿媽都唔認得！所以嗰啲唔陪媽咪買餸幫手搦嘢嘅小朋友全部都係仆街仔嚟，阿媽都唔會認得你呢個剩係識食嘅飯桶！
返到屋企之後唔見QQ喺到走來走去，完來攤咗喺床度，奇喇…佢好少瞓晏覺㗎喎，不過點都好，唔好嘈醒佢，就溫下默書先。
Q：「交…叉仔…」
竊書不能算偷…竊書！…讀書人的事，能算偷麼？
窺淫不能算惡…窺淫！…男女間的事，能算惡嗎？
Q：「交！叉仔！」嘩！唔窺喇，嚇鬼死。




我：「做乜呀…妳唔係瞓緊晏覺咩？」
Q：「我…有啲嘢…想搵你幫手…」
我：「係乜嘢呀，你即管講啦。」
Q：「我…好唔舒服。」佢個樣面有難色咁。
我：「係乜事呀，頭先放學前你重好地地㗎。」
Q：「我M痛呀…」呢個女人呢…
我：「咁…我可以點幫到妳，放心我唔會叫妳飲水，花街朱古力啱唔啱？」
Q：「你唔好喺度講笑啦，今次痛得好交關…」
睇到佢咬緊牙關個樣，就諗返起佢兩日前風流快活英姿煥發；雖然科學堂未教，我都知道安全期係喺M期前後嘅，無計啦，鬼叫我同細蚊都曾經玩到風生水起，係識多人哋少少嘢㗎喇。
我：「睇嚟，病因係前日有兩劑雄性蝌蚪狀細胞侵入體內進行破壞，四處遊竄，導致今日嘅悲劇。」




Q：「我好唔舒服…唔得閒同你鬧架，你激少我一陣得唔得。」乜喎，平時都對妳好好。
我：「唔講笑囉，但我都唔知有乜可以幫到妳，斟杯水畀妳食必利痛嘞。」
Q：「我一返到嚟屋企已經食咗喇…」
我：「咁我有乜嘢可以做到？講故仔氹妳覺覺豬？」
Q：「我想同你講，我包M巾啱啱用晒。」
聽到佢咁講，我個額頭即刻有冷汗冒出。
我：「咁點算好？」都可以話係明知故問。
Q：「幫我落去買包。」都真係夠晒直接。
我：「吓…但呢啲女人嘢，我點會識買喎。」
Q：「咪又係攞包嘢去counter畀錢，你唔好同我講condom你識買，呢啲唔識買呀下！」




我：「唔係呀…其實dom我都未買過。」
Q：「妖，咁你同細蚊點做㗎？算，唔問你，總之你一陣幫我落去買包啦。」
我：「但係…但係…」