thriXt Qantasy 純文字安眠之作 (New: - U2K - 一直上架): 336

Q：「但係乜呀，你唔係好惜我嘅咩，唔係咁都唔幫我呀，我痛到死死下喇。」
我：「我都想幫，但係我點知買邊隻先啱喎。」
Q：「畀個包裝你，同我認住佢啦。」
喺呢方面QQ當然非常醒目唔會有機會俾我托佢手踭，遞咗個塑料封套畀我。
我：「但係，如果我買緊嗰陣俾人睇到咁點算？」
Q：「有乜特別，幫屋企人買唔得嘅咩？」
我：「但係…我都無乜屋企人，俾人見到好可疑…」
Q：「咁你趁無熟人喺附近先快快手幫我買囉。」
我：「不如，妳抖抖先，夜少少我陪妳落去一齊買好唔好呀？」
Q：「頂你個肺，如果我自己可以落去重使撚你陪咩？你自己落去超市攞住包M巾俾人見到就好大鑊，咁如果我同你一齊夜晚出現喺超市俾人見到唔係重大鑊咩？」




我：「係嘅，妳都講得啱，的確好危險…」
Q：「你咁驚一係叫細蚊陪你囉，或者叫佢幫你買上嚟都得，嗰個女人實肯幫你嘅。」
我：「呢啲嘢…點好意思麻煩人哋喎。」
Q：「哦，人哋就唔好意思麻煩，我辛苦就唔肯幫我，乜你唔係好惜我對我好好要養我嘅咩？」
我：「但…唔係呢個範疇吖嘛。」
Q：「喂，死人頭你同我過嚟。」
聽到佢咁講，我唯有無可奈何跪咗上我張床度。
Q：「嗱，望住我，跟我講一次。」
我：「哦…要講乜呀？」
Q：「我，交叉仔。」我：「我，交叉仔。」




Q：「好惜右女神。」我：「好惜右女神。」
Q：「一定會幫佢買到衛生巾返嚟。」
我：「一定會…得喇，會幫妳買喇，但係再晏啲先好唔好，啱啱放學好易撞到人㗎。」
Q：「嗯，都得嘅，但唔好太夜，如果唔係你知道會點㗎啦，唔係要我提你呀？」
我：「唔係會點，打死我？」
Q：「無咁得閒，打死咗你邊個返工養我喎，只不過你要幫我洗褲，底褲，床單洗死你啫。」
我：「唔好！我知錯，一陣就會落去。」
Q：「嗯，唔該你喇，咁我瞓陣先。」
佢講完就攬住佢隻豬擰咗埋牆。
今次真係改百佳枚玩死咗自己，嚟到PARNnSHOP呀…要買護舒寶…呢個女神都蠻不講理嘅，明明頭先放學點解唔順便自己買埋喎，M痛有無咁痛呀，落一落去都係十零分鐘咋嘛…但係我又唔可以逆佢意，點算好呢，我從來都無諗過身為男仔竟然要買一樣咁嘅嘢，俾熟人見到實笑足一世都似。




喺無得揀之下，我再溫多咗陣書就隻身帶住躊躇嘅步伐嚟到百佳嘅門口，咁大個仔我都未試過因為要入百佳買嘢而咁緊張，重驚青過我小學第一次自己嚟買嘢驚唔識找錢。
正當我喺門口猶豫不決嘅時候，竟然俾我喺對面嘅文具鋪見到一個人！我諗緊應唔應該去打搞佢，不過觀察咗一陣之後發覺佢得自己一個人，我同佢見面應該都無嘢嘅，於是我就行去佢後面拍一拍佢膊頭。