為了實現媽媽遺願，我成為了女兒國唐僧: 333

健：「係嘅…你講得啱，做到朋友已經好好，朋友都未做到就表白，我諗佢只會覺得我發神經。」
好，非常好，抑制到佢表白嘅妄想我就已經成功。
我：「無錯，只會覺得你係一個想呃蝦條嘅黐線變態佬，未見過面就想捉人哋上床。」
健：「去死啦你，我先無你咁鹹濕呀！」
我：「我知喇，一定係你無我咁鹹濕所以無豔遇，哈哈哈…不過我而家從良。」嚴格嚟講都係嘅。
健：「Bubble師姐對波…好似好好揸。」
我：「點睇都係啦，又話對人哋無興趣嘅？」
健：「我又唔識佢…點會無端端有興趣喎，只係單純論個外觀，好想試下，想用手感受下，睇下入面係點，粒的係乜顏色…」
我：「我諗呢度在座所有男仔都想囉，不過…乜你又好識Kuromi咩，鍾意人哋啲乜嘢喎。」
健：「我都唔知…但好想見佢。」




其實呢，你每日返學都見到佢㗎喇。
呢啲少男多餘嘅情感，其實都幾無謂下，我都想試下做女仔，要玩謝佢哋睇落就易如反掌。
我：「好喇，都放咗學好耐，走人先。」
健：「吓，咁快，唔似你喎。」
我：「女唔係靠昅返嚟嘅，喺度睇多兩粒鐘都係咁嘅啫，除非你係諗住有行動啦，齋睇好過癮咩，佢哋連衫都未換，過兩日先嚟睇啦，我唔想俾人當做變態。」本來我就唔係太care其他人點睇我嘅，但難保有其中一個啦啦隊隊員同Queenie好熟，將我嘅失德狀態話晒畀佢聽咁就唔係幾好。
健：「咁去唔去中心打下乒乓波呀？」
我：「唔喇，有嘢做，下次先啦。」
健：「吓，有乜做呀，你真係唔同晒。」
我：「要去買餸呀，個雪櫃好空，我唔似得你哋有媽咪負責你哋今晚食乜餸。」
其實主要係逗咗好多利是，想買啲好嘢同QQ一齊食，加埋就順便摷下有無過完年嘅賀年食品散貨賤賣，無計啦，窮就係咁過日子㗎喇。




健：「唓，你以前咪又係玩到八九點先去百佳買，都攞嚟講嘅。」
我：「呀，咁重有星期五默書吖嘛，想返去溫咗先同埋做功課。」當然唔係想快啲返去陪Kuromi。
健：「自從聖誕之後你就好似古古怪怪咁，係咪有啲不可告人嘅事？」
我：「點會喎，就嚟揀科吖嘛，重日日去玩咩，我唔想死住呀，你睇下阿康佢每日一放學就要趕去補習社，佢阿媽都算狠咯，個個月兩三千好似唔係錢咁…」話時話我真係好廉價嘅小朋友嚟…