為了實現媽媽遺願，我成為了女兒國唐僧: 319

我：「吓？乜嚟㗎，咁似出奇蛋但又唔係出奇蛋嚟嘅！呢個係咪翻版嚟㗎…」我手上就係一盒三隻蛋，但上面無kinder呢個字，亦無suprise，唔好呃我屋邨仔就唔識三個願望呀，妳歹我都上youtube睇過以前嘅電視廣告，但QQ無理由會…
Q：「翻版你個頭呀，呢個係zaini蛋嚟！」
我：「有乜唔同，重唔係抄kinder？又有玩具。」
Q：「你唔好識少少就扮代表啦，未見過就話人哋抄kinder，zaini係西班牙嘅老牌朱古力廠，已經超過一百年歷史，重耐過kinder母公司ferrero，即係金莎果間廠，以前個世界無咁重視版權，國際貿易無咁蓬勃，歐洲每個國家都鍾意自己生產嘢比返自己用，隔籬國家整自己又整，咪有咁嘅情況囉，你識唔識榛子朱古力醬nutella呀？」
我：「識呀…細個最鍾意就咁潷嚟食，而家驚肥驚蛀牙，所以唔會再買。」
Q：「nutella咪就係意大利廠ferrero出㗎囉，同一樣嘢西班牙叫nocilla，德國叫nudossi，重有希臘叫merenda…」
我：「夠喇夠喇，妳點解會知咁多嘅？」
Q：「因為我鍾意食囉，小學六年班做過專題研習，將歐洲啲大朱古力廠都study過。」
我：「好好好…咁點解唔買kinder嘅？」
Q：「因為kinder為咗喺美國賣，要符合當地嘅食物安全條例，規定食物唔可以包裹住異物，所以好耐之前隻玩具已經唔係放喺朱古力入面，西班牙zaini唔諗住賣去美國咪繼續係傳統咁嘅樣囉，自從kinder轉咗款，香港就越嚟越多地方賣zaini蛋，同埋kinder啲玩具太呃錢，唔鍾意，minion三隻蛋得一隻係minion。」




呢個牙尖嘴利嘅右女神吖，真係怕咗佢。
我：「嗯…好多謝妳嘅朱古力，Queenie…」
Q：「我剩係請你食朱古力㗎咋，入面嗰三隻hello kitty係我㗎，你唔好吞埋落肚。」
我終於明點解美國立法唔俾我獨吞入面啲玩具…
我：「即係我負責幫妳食朱古力，妳就要hello kitty，咁就唔驚肥喇，係咪？」
Q：「你鍾意點諗係你嘅事，如果你唔想食就畀返我，唔會勉強你。」QQ伸手板出嚟。