為了實現媽媽遺願，我成為了女兒國唐僧: 318

Angel暫時告別了，有意見就請留言～

我：「嗯，你講得無錯。」
我唔係話驚俾人捉姦咁，或者擔心得失邊個女仔，只不過咁嘅場面有啲唔知點處理好。
A：「果然好靚女，配得上女神呢個名呀下。」
當然啦，Queenie今日重要化埋妝兼悉心打扮。
我：「係嘅，唔通呃妳咩。」
A：「睇嚟，情人節完咗，我係時候要還返你畀女神。」
我：「唔好咁講啦，我同佢…又無乜嘢。」
A：「好好照顧女神，我返屋企打潛艇喇。」




我：「Angel姐姐…」
A：「唔使擔心我，我會好好生活，bye bye喇，死人爽。」佢講完就同我揮手行去另一邊。
我都未趕得切同佢道別佢就已經行開咗，我唯有回以一個揮手；其實，佢今日應該都係專登等埋我先放工，估唔到我哋嘅最後一晚會完得咁突然，我覺得自己有少少對佢唔住，不過都無辦法啦，鬼叫我係一個無鬼用嘅死細路。
或者幾年後我哋會再次相遇，到時我會再一次flirt妳，氹到Angel妳陪我上床為止，就睇下邊個咁唔玩得會愛上對方先…
結果連contact都無交換到，或者咁樣對我哋嚟講先係最好嘅結果；就等我哋一齊打到啲交通工具爆為止，直至搵到屬於我哋嘅幸福…話時話潛艇可唔可以算係交通工具呢？我覺得剩係攞嚟裝條魚雷入去架艇入面射出嚟好難歸類做交通工具。
一路諗住Angel隻潛艇，一路行到去QQ面前。
我：「Queenie，做乜嚟接我嘅？」
Q：「喂，啱啱喺妳隔籬嗰個姐姐係邊個嚟㗎？」Queenie明顯無理我同佢講乜，單刀直入就問姐姐嘅事情，其實…同妳有乜關係呢？
我：「無呀，一齊喺酒樓返工嘅同事嚟咋嘛。」
Q：「無聽你講過酒樓入面有個後生姐姐做同事喎，乜呢間酒樓專請童工㗎？」




我：「乜喎，佢唔係酒樓請㗎，係啤酒商派過嚟嘅啤酒推廣員，同埋佢十八歲㗎喇，點會童工喎。」
Q：「啤酒妹就啤酒妹啦，推乜鬼廣員啫。」
我：「咁我都係尊重佢份工啫，正經女仔嚟㗎。」
雖然Angel係一個啤酒妹，但我覺得佢算係好正經㗎喇，如果你對比返佢以前嘅光景。
Q：「正經姐姐…好似唔多啱你咁，點呀，趁佢未行遠，妳使唔使追上去呀，唔好賴我阻你溝女喎。」
我：「乜溝女喎，普通同事嚟啫。」
Q：「睇佢個樣都幾清秀吖，你應該鍾意㗎，而且你不朽同姐姐玩開奇怪遊戲㗎啦，情人節都重嚟sale啤酒重唔係單身，真係唔追？」
我：「黐線，無端端追乜鬼喎，點睇佢都唔似會鍾意我呢個小朋友啦。」咁樣唔算呃QQ掛…
Q：「唓，我都係唔想睇住你情人節一個人咁淒涼啫，如果有機會就博一博啦。」
我：「吓，如果佢肯我又可以點？捉佢上嚟等妳睇住我哋兩個玩？」




Q：「有乜所謂呢？你明知我好大方㗎，我都想欣賞下你呢個鹹濕仔會點炮製姐姐。」
我：「唔好癲啦，妳肯人哋都唔會肯，已經唔見咗佢喇，唔好再講佢，係呀，估唔到我今日都重會有五封利是收！真係超好彩！」
Q：「知你有畀心機返工養我喇，多謝交叉仔，呢份禮物係送畀你㗎，好彩未過十二點重可以叫做情人節禮物。」
QQ將一盒嘢交到我手上，但我哋又唔係情人嚟，送乜鬼情人節禮物喎，即係道義朱古力？