為了實現媽媽遺願，我成為了女兒國唐僧: 294

然後話咁快就到咗初六，星期日。
馬：「呀爽，你聽日返學未呀？」
我：「未呀，星期三先返學。」
馬：「哈，家陣做學生真係夠晒爽，雖然新年已經差唔多完，但係聽日情人節又會多啲客，你想唔想返埋聽日呀？」
我：「好呀，無問題，放假有得返梗係返啦。」
嗯…話咁快新年就到尾聲，聽日就係情人節，又係我傷心嘅日子，一諗到QQ佢…都唔係嘅，佢開心咪得囉，佢條仔惜佢多啲，佢平時就會開心啲，我日子都會過得好啲。
重有另外一個問題，就係唔知Angel姐姐會喺度做到幾時呢？完咗新年呢個job，可能以後都唔會再見到佢，雖然我都唔知如果我唔係同佢一齊返工為乜要見佢…
我：「Angel，妳會喺度返到幾時呀？」
A：「返埋聽日囉，之後應該有排抖，要等捷成嗰邊再派job，唔知會返邊度咯。」
我：「捷成？個名咁熟嘅…」




A：「捷成咪藍妹個代理囉，佢重有做好多嘢㗎，例如Dyson風扇，同埋你日日用嘅Casio計數機，重有手錶都係佢哋嘅，聽聞Casio嗰邊間唔中都會請promoter，我都想試下。」
我：「啤酒妹姐姐變計數機手錶姐姐？」
A：「如果係嘅話襯唔襯呀？係咪會乖咗？」
我：「都無乜分別啫…邊樣會好做啲？」
A：「我都唔知呀，啤酒就實有人嗌嘅，如果賣手錶…我驚一日都sale唔到一隻會俾人鬧，哈哈。」
我：「唔緊要啦，妳咁勤力，應該做乜都OK嘅。」
A：「係呢，重有無故仔聽呀？」
我：「無喇，有都講晒啦，唔好以為我拍過好多次拖，我重好細個㗎咋。」
對於年齡呢樣嘢，我心情係有矛盾嘅；由於我細過佢，就好似可以嗲下佢，同埋會有啲著數，佢又唔會咁有戒心；但如果我扮到大個啲，就可以同佢平起平坐，自自然然咁flirt下佢，或者…可能…會有啲意想不到嘅驚喜。
諗到呢點就掛住大卡車，呢個女人大細，主客，攻受都得，可以完全隨住心情而改變，真係dynamic到呢…係呀，係完全駕馭唔到佢，亦都唔識點愛佢，但就會由心底咁鍾意佢呢個姐姐，帶住尊敬嘅心去欣賞佢，當然重玩得好開心。