為了實現媽媽遺願，我成為了女兒國唐僧: 293

A：「唔同你玩呀，你個褲袋都好脹咁喎，收咗幾多封呀？」
我：「我諗…三十幾掛。」
A：「妖，點解你執枱可以重多過我㗎？」
我：「因為我係個可愛嘅小朋友。」
對住Angel，我已經可以100%重返玩嘢mode。
A：「頂你啦，有利是收就喺度扮晒嘢，嘔心得你吖。」有口話人無口話自己…妳個妝扮夠…
我：「點同喎，啲客會幫襯妳㗎嘛。」
A：「呢幾日收利是好過賣酒啦，你估搬搬抬抬好過癮咩。」
我：「試下再拉低啲件衫，等啲客攝利是入Bra囉。」其實我喺佢側邊已經䚎到佢個粉藍色Bra邊，果然襯返blue girl呢個主題。
A：「你個死鹹濕仔…我唔係夜總會啲舞小姐呀，喂！你話過會繼續講故仔畀我聽㗎。」




我：「咁心急做乜，畀我抖返一分鐘都好吖。」
知唔知呀，一路執枱一路賀年，唔止手軟，就嚟連個口都軟，要一路笑住講嗰啲四字詞…
A：「新年想聽返啲開心嘅嘢咋嘛。」
我：「嘻嘻，係咪好想搵返個小弟弟嚟玩呢，唔好意思呀，我從良咗好耐唔available㗎喇。」
唉，如果唔係QQ，我一早已經諗緊辦法睇下點樣可以水佢上我屋企陪我玩啲熱辣辣嘅遊戲，為呢個唔太凍嘅寒冬增添一點點嘅暖意。
A：「你從良？我就唔係好信嘞，不過我剩係想聽故仔咋喎，你唔好諗太多。」
剩聽故仔？係咩…等我再講多啲Carmen嘅瘋狂事蹟妳聽，我就唔信妳呢個啤酒妹把持得住，等妳聽到㷫熻熻想攞個啤酒樽頸自插都好。
結果初三到初五，我哋兩個返工就日日見面，佢忙住sale啤酒，我忙住執枱，我哋都忙住收利是；然後一得閒我就同Angel講故仔，由Carmen講到Mandy，就連上次點樣『威風凜凜』咁打走細蚊條仆街EX都講埋；我發覺Angel係一個好好謦嘅女仔，雖然唔會好似Carmen咁黐線，但就係傻更更同超八卦，唔知係咪姐姐對住弟弟就會特別open呢，乜都講得，唔會話有尷尬嘅感覺，就連我同細蚊第一次係點啲細節佢都好有興趣。
點講呢，話矜持佢就一定唔係㗎喇，似係玩得同埋有啲世界女feel咁囉，都襯返佢份工嘅，唔通怕怕醜醜口窒窒咁喺度賣啤酒咩；當然，我諗佢都係覺得我哋無可能先會謦得咁放嘅啫，如果俾個男仔發現原來妳係咁easy嘅話，唔呃妳上床玩完就走人點對得住自己喎…正所謂有食唔食…所以QQ先要對住自己條仔扮純情小女生咋嘛。
但係，Angel同我就企到越嚟越埋，手臂貼手臂嗰隻，而且佢啲皮膚都好嫩白滑…




死火，我feel到自己越嚟越心動，唔係話好似QQ嗰隻為妳鍾情取代埋女神嗰隻，而係真係好想曳下，抱下佢，惜下佢嗰種，好想同佢enjoy…一齊開心下，我諗Angel都或者有少少意思。