為了實現媽媽遺願，我成為了女兒國唐僧: 295

唉…諗都無用，我唔應該咁，唔想做返以前嘅自己，玩下玩下係好開心，但事後就會覺得空虛，而且我而家心入面係有女神喺度。
A：「喂，明明你屋企有個女神喺度，做乜唔講下佢，話晒聽日都係情人節喎。」
我：「妳係咪唔記得佢有仔呀…聽日…咪睇住佢出門口搵仔仔扑嘢囉，有乜好講。」
A：「呀…係喎，Sorry…咁唔好講佢喇。」
我：「是但啦，佢開心咪得…係呢，咁妳又有無故仔講返畀我聽？」
A：「新年流流，無謂聽啲唔開心嘅嘢啦。」
我：「唔會乜都唔開心呀？」
A：「好似真係無乜開心嘢發生過。」
我：「今日賣咗幾多枝啤酒呀？」
A：「今日都OK吖，都過百枝，算係咁㗎喇。」




我：「咁收咗幾多封利是？」
A：「嘻嘻，都重有十封。」
我：「咁今日唔係算開心喇咩？」
A：「今日開心囉，其實返工有你陪我都開心。」
我：「Angel…唔使咁唔開心吖，起碼妳係個靚女嚟先，而且身材都叫做唔錯，皮膚又好，我以前都無見過啲好似妳咁好睇，又青春活潑嘅啤酒妹！」
其實…我呢啲買燒臘飯盒，蒲便利店，食屋邨快餐店同M記嘅小朋友幾可見到啤酒妹吖，最多係喺球場打完波經過大排檔䁽到兩眼囉，又或者喺便利店睇住佢哋放工去便利店買飯盒，或者煙…
A：「你個死仔包吖，咁口甜舌滑做乜？」
我：「等妳開心下囉。」
A：「肯定係你個變態姐姐教到你咁樣。」
我：「都唔係幾關事，無師自通嘅，不過佢係提供咗個機會畀我練習囉，但係…我都只係會講事實，絕對唔係口甜舌滑。」




A：「你條友仔真係吖，不過你都講得啱嘅，如果唔係我個樣重OK，我都搵唔到份賣手飾嘅工，亦都唔會做到啤酒妹，咁我就可能會更加慘好多。」
我：「的確係呀，靚女實在係著數好多。」
A：「你把口咁樣，實溝死女都得啦。」
我：「哈哈，咪死剩把口囉，不過無乜用㗎咋，攞嚟玩下就得，溝女最實在都係靠S加兩棟。」
A：「唔好咁現實啦，會變壞男人㗎。」
我：「咁放心都得，我無資格做壞男人，如果我有錢，或者可以包起Angel妳先。」
A：「包起我嚟做乜先？」
我：「放妳…喺屋企，斟可樂畀我飲？哈哈…」
A：「我有手有腳識做嘢使乜鬼你包喎，重有唔好唔記得你屋企有個女神喺度，包都包佢先啦，如果你有錢嘅話…幾時輪到我喎。」
我：「無喇…包唔起，夠佢有飽飯食都心足。」




A：「睇到你咁樣都唔知笑好定喊好。」
中場休息，執下枱先。