為了實現媽媽遺願，我成為了女兒國唐僧: 292

本身我就無為意有呢樣嘢嘅，所以都無話有啲乜期望；由細到大都係嗰十封八封㗎啦，老竇，婆婆同舅父舅母，爺爺嫲嫲退休返上大陸搵佢哋啲兄弟姐妹之後都變成WeChat紅封包嚕；大伯同姑媽跟埋公司返東莞做嘢之後都好少見面，有就有，無就無，嗰一百幾十蚊就隨緣啦，我都懶得賀年；重記得我細細個嗰陣係有個著得幾妖豔嘅姑姐，畢咗業喺間日資公司做嘢，唔使一陣就嫁埋過去，當然就唔會有日円利是收的。
總之，專心執枱啦，有雙工已經發達。
「爽仔，新年進步呀！」
咦，係其中一個平時落嚟打躉睇波嘅伯父喎，當我發現佢喺身後嗌我嘅時候佢已經攞埋利是出嚟。
我：「叔叔，恭喜發財，祝你橫財就手，新一年馬到功成，球球是道，盤滿砵滿！」Yeah，又一封！
「死仔包，又會咁識講嘢嘅，把口（啷）油㗎？」
喺我重賣緊笑嘅時候，有位姨姨諗咗一諗就伸手入手袋入面，咁就順便啦。
我：「幾位auntie，祝妳哋身體健康，容光煥發，青春常跓，年年廿八歲；BB仔快高長大，幾位小朋友聽教聽話，學業猛進！」
幾位小朋友其實都初中咁款，望住我呆晒。
「你都工作順利，學業進步喇！」




就係咁，成張枱就俾我Clear咗。
由於個場實在係太多人，啲阿姐斟水都斟唔切，於是我幫下手又有幾封；有啲叔父喺度打啤，我就去清走啲碟等佢哋多啲位，講句玩得開心啲又有幾封；而我平時嚟返工令到啲阿姐有得準時收工，所以佢哋都一人封咗一封畀我；廚房佬就…算啦，佢哋今日應該炒到手跛都似。
至於Angel姐姐就當然全場走個唔停，佢今日容光煥發，個妝比起平時係厚咗嘅，食咗過期春藥咁不停幫啲阿叔斟酒，心口三粒鈕一粒都無扣過，妳小心激親人哋啲老婆呀…
嗰種由銀包入面笑出嚟嘅笑容，係有樣睇嘅。
我：「Angel姐姐，祝妳青春常跓，年年十八歲！」
A：「玩嘢呀？！仆街仔，邊個俾你同我拜年㗎！同埋我今年真係十八歲，唔使祝我。」
我：「吓…咁都話我玩嘢？唔係呀化…」
A：「咁都唔係玩嘢，點先係玩嘢呀？」
我：「好啦，咁我認真玩多次，Angel姐姐，我祝你左右逢源，如魚得水，春意盎然，出入平安，連生貴子，三年抱兩。」
A：「你條粉腸真係唔係講笑㗎喎…赤口流流係咪想我嚟同你開年呀？」




我：「唔好咁大力就得，我怕醜㗎。」
其實由一開始，我已經決定咗Angel係囉嚟玩嘅。