為了實現媽媽遺願，我成為了女兒國唐僧: 291

我：「呢個咋，妳都俾人表白慣㗎啦，唔爭在。」
Q：「點同喎，咁我喺學校係女神嚟，啲男仔無厘頭走過嚟表白，我拒絕得心安理得吖嘛。」
係咪夠撚晒奇怪？一個女神私底下同我講句咁嘅嘢，而我心底裡係好鍾意佢想同佢表白。
我：「妳咪照辦煮碗咁say no囉。」
Q：「咁樣好似好奇怪吖嘛，網友應該唔係咁。」
我：「點怪都無所謂啦，佢又唔會摷到妳出嚟。」
Q：「我無所謂啫，我驚佢會有心理陰影。」
我：「乜原來妳會關心佢㗎？」
Q：「我對人不朽都咁好㗎啦。」
我：「原來係咁，睇嚟我要好好重新認識妳。」




Q：「如果我對男仔唔好我條仔都唔會有得衰十一啦，係咪先？」我就覺得未必，妳都有份發姣。
我：「你兩個都麻鬼煩嘅，一個就叫我一齊玩想我幫佢助攻，一個就叫我喺度拖住佢等佢唔好表白，左右做人難，究竟我可以點喎…」
Q：「最衰都係你呀！唔係你一開始拉埋我三排，點會搞到而家咁，你要負返責任呀。」
呢兩隻嘢，竟然可以用同一個理由嚟怪返我，係咪性賴㗎，話唔埋佢兩個都幾襯；唔係唔係，（舌累）口水講過，佢兩個一啲都唔襯，梗係我同QQ最襯啦！雖然我都知我喺度自己呃自己。
結果，時間就咁樣安然地度過，流逝。
初一夜晚同QQ清埋嗰三盒團年餸。
初二繼續食年糕同蘿蔔糕，小朋友記住煎年糕要加蛋，女人作文嗰陣千祈唔好搞佢。
初三就同QQ出咗街，無理由新年日日都匿喺屋企㗎嘛，係咪？不過就唔係去玩同扮拍拖喇，出面個市都已經開返，我哋去到一個遠一遠嘅商場行街；佢用媽咪畀佢嘅利是錢買咗對平嘅出街鞋，再去68同H及M買咗一啲實用嘅衣物，再簡簡單單咁食咗餐food court，然後佢送我去返工。
因為返屋企就會經過酒樓吖嘛…其實夜晚九點幾我哋都驚撞到熟人，不過都唔驚得咁多，夜鼆鼆條街唔係太多人前後腳可能重礙眼。
至於你問我哋有無拖手？心照啦…




係喎，返工就會見到Angel，差啲唔記得咗佢。
過完年開返市，個場有幾多人就可想而知啦。
喺我著緊白恤嘅同時，馬叔叔佢走咗過嚟。
係喎，差啲唔記得，雖然我屋企無乜新年氣氛，但出面個世界仍然係過緊年㗎喎！
我：「馬叔叔，祝你新年進步，身體健康，龍馬精神，生意興隆，東成西就…」
馬：「得喇，你都學業進步，唔使咁客套喇，呢封開工利是嚟個個都有嘅…」
我：「多謝馬叔叔。」我雙手接過利是。
馬：「嗱，我哋酒樓做法係唔會主動同人賀年嘅，不過你咁細個，如果你見到啲客有意思嘅話，咪同佢哋講幾句好說話囉，出去做嘢喇。」
我：「收到，我識做㗎喇！」