為了實現媽媽遺願，我成為了女兒國唐僧: 273

我：「Hi…細蚊…妳喺度。」
其實呢，住喺同一條邨，啲生活pattern又差唔多，平時都好少專登去第二度，食來食去就係嗰五六間餐廳，我哋會撞到喺一件好正常嘅事。
蚊：「咁夜先落嚟食嘢嘅，就嚟乜都賣晒。」
我：「鋸扒無咁易賣晒嘅，妳得一個人嘅？」
蚊：「老竇加班，阿媽接佢，我懶得郁。」
我：「哦，咁我嗌嘢食先。」
嘩屌，小菜差唔多賣晒，海南雞賣晒，煲仔飯賣晒，好彩我嚟鋸扒嘅啫，減完十蚊就六十蚊都唔使，算係咁啦；吖頂，原來呢期又無咗酥皮湯，唔怪之得好似平咗兩蚊咁…
嗌完嘢食就返埋位等number。
細蚊食焗豬，永恒嘅穩陣夠飽之選，而佢已經差唔多食晒，咁我就喺佢對面坐低咗；以前嘅話通常都係會坐佢隔籬，容易鹹濕佢吖嘛，右手就喺度食飯，左手嘅手指就唔知喺度撩緊乜咁，都不知幾咁忙；然後食完佢就會挨喺我隔籬一齊玩電話。當然都係要細蚊確認咗父母唔喺本區先，我都唔想俾人老竇老母捉姦，好煩㗎嘛，所以如果佢媽咪拖住細佬買餸嘅話，我哋就會避返我屋企先。
蚊：「竟然係你自己一個落嚟食？」




我：「Queenie去咗拍拖，我唔想煮咪落嚟食。」
蚊：「哎唷，人哋有拖拍咁開心呀。」
我：「乜喎，一早講咗佢係有仔㗎啦，妳唔係唔信呀，我哋只係住埋一齊㗎咋，就算佢唔係去咗拍拖我哋都唔會一齊落嚟食啦，呢附近咁多同學…」
蚊：「原來你哋要匿喺屋企偷情。」
我：「無呀，喺屋企聽佢調情就多。」
蚊：「難唔難頂呀？」
我：「都無嘅…無辦法，一嚟到已經係咁，慣咗。」
點都好過妳當時粒聲唔出跟咗條仆街仔走嘅。
蚊：「佢咁樣呃住佢條仔遲早出事。」
我：「理得佢，唔關我事，佢條仔又畀唔到地方佢住，唔係我迫佢留喺度嘅。」




蚊：「你今次真係有齊天時地利人和嘞。」
我：「地利啫，佢有仔何來天時人和。」
蚊：「咁你有無進展呀？」
我：「可以話…係無嘅。」
蚊：「但睇落你都好似過得幾開心咁。」
我：「哈…都算係嘅，好過自己一個。」
蚊：「日日有個飛釘靚女睇，實開心死啦，都係唔好諗落去，盞自己傷心。」
我：「我要出去捧餐先喇…」
八點零嘅大家樂已經唔多人，我索性捧咗份鐵板去隔籬位度淋汁，咋咋淋咁費事彈到個靚女啦，咋完先搬返返嚟。