thriXt Qantasy 純文字安眠之作 (New: - U2K - 一直上架): 274

蚊：「食鐵板飲中湯，你都幾得意㗎喎。」
我：「我想㗎咩，西湯賣晒，是但啦，無酥皮湯嘅話乜湯都係差唔多嘅啫。」
蚊：「做乜咁夜先落嚟食嘅。」
我：「諗住食完返工啱啱好吖嘛，唔使行多轉。」
蚊：「係喎，你而家有工返，通常返幾點？」
我：「星期五六日同公眾假期，九點半。」
蚊：「呢個時間真係啱晒你，以前中心閂咗你都係喺條街蒲到十一二點。」
我：「無啦，而家要煮飯畀人食，屋企有人好少可自己一個落街。」
蚊：「知你叻喇，搵錢養女人，真係估唔到。」
我：「狗急跳牆嘛，唔通叫老竇幫手咩，我都唔敢俾佢知，我唔返工真係無錢喂飽佢。」




蚊：「一個月有幾多錢呀？」
我：「二千零囉，係僅僅夠佢食飯㗎咋。」
蚊：「都好吖，我一個月飯錢都無二千…」
我：「咁妳係返學先要自己畀錢啫。」
蚊：「你真係好惜Queenie，如果你當初有咁惜我，咁就唔會…係嘅，我都唔值得你咁惜我。」
聽到佢咁講，我鋸緊扒隻手都停咗。
我：「細蚊對唔住呀，我知我以前好衰，又曳，又懶，對你唔好，成日唔理妳…我知我好亂嚟，由頭到尾都無珍惜過妳，覺得有妳喺度就算。」
蚊：「其實你有無鍾意過我？」
我：「有…就實有…但…」
我都美言唔到自己喇，俾著以前嘅我就一定會拍晒心口咁話好鍾意，但自從識咗QQ之後我領悟到鍾意唔係咁嘅一回事；以前同佢一齊，係鍾意佢身體，鍾意佢服侍我，鍾意有佢排解我嘅寂寞，鍾意嗰種有女喺身邊嘅感覺，至於佢嘅感覺係點，我完全係賴理不理。




蚊：「但我唔係女神吖嘛。」
我：「其實…女神都唔係重點嚟嘅。」
我諗唔係掛，如果女神咁重要，我一早就迷戀佢，知道有得坐佢隔籬實開心死啦，點會喺週記度嫌佢麻煩喎；真正令我鍾意佢嘅，係佢返到屋企放低女神包袱之後嗰一面，背地裡嘅古靈精怪，同埋一齊生活嗰種感覺，再加上欣賞到佢喺唔同方面嘅才華；我而家先知，吃不到嘅葡萄唔係酸嘅，而係甜到漏汁。
蚊：「唔緊要啦，你去到最後都識對我好。」
我：「細蚊…就算我哋唔係一齊，我都會對妳好㗎，以後一直都係。」
蚊：「咪喺度讕好人啦，嘔心，快啲食嘢先啦，攤到凍晒就唔好味。」
細蚊佢已經食完，就繼續坐喺度陪我；對女仔嚟講一大碟焗豬實在係太大份，所以食晒面嗰層餸之後通常都會剩低咗半層蛋炒飯喺度，加埋細蚊細細粒佢都唔算係大食，我好肯定QQ係食得晒。
我：「介唔介意我攞走妳啲飯送黑椒汁？」
其實我自己都有個奇形怪狀嘅不知名焗飯仔，不過對我呢啲血氣方剛嘅被獨留在家兒童嚟講，飯永遠係多多益善，尤其係炒飯。