為了實現媽媽遺願，我成為了女兒國唐僧: 272

到咗兩點QQ就喺度換衫，化妝，整佢啲頭髮；而由於我實在太無聊就坐喺佢隔籬欣賞佢打扮自己，咁都有嗰啲嘢睇嘅，但唔係重點嚟，我係真心覺得女仔執靚自己係一個宏大工程，好值得我嘥時間觀摩一下，而且佢真係好可愛。
Q：「…」佢畫完條眼線對住我係咁眨眼。
我：「Queenie做乜？眼皮抽筋呀？」
Q：「無呀，電下你囉，睇下有無反應咋嘛。」
我：「我應該要有乜反應，俾雷劈中累低？」
Q：「唓…都唔好玩嘅。」
我：「咁我日日對住妳，唔會咁易受到刺激㗎嘛。」然之後佢唔理我繼續扮靚靚。
我：「點解妳睇唔到個頭後面都可以紮到辮嘅？」
Q：「因為我係女仔囉。」
我：「點解女仔可以識咁多嘢嘅，搞到男仔好似好廢咁。」定係呢個其實係我自己問題嚟…




Q：「女人識生仔添呀，你哋啲廢J剩係識射精。」
女神…俾其他人聽到妳咁講嘢嚇死都似。
我：「男仔好似剩係識玩，打下波咁，無乜特技。」
Q：「都唔係嘅，你哋有多角度千里眼。」
我：「即係點樣呀？」
Q：「你哋隔咗一百米遠都可以瞄到個女仔走光，重可以喺樓梯罅望到兩層樓上面個女仔條底底係乜嘢色。」
我：「妳唔好咁清楚我哋得唔得？」
Q：「好難喎，男仔頭腦咁簡單，我諗緊寫小說用男仔做主角好唔好，好似易寫好多，例如話自己下面不期然硬咗就可以解釋一切，寫少好多字，你諗下吖，淨係要寫女仔忐忑不安都已經好高難度，何況我哋會小鹿亂撞添。」
我真係想嗌救命，女神，妳個樣唔多似會小鹿亂撞喎，似守株待兔多啲，咁妳又有無試過對我小鹿亂撞呢？
Q：「呀！諗到，去top blade鋸扒先，一人二百多啲啱啱好，重有薯條任食唔驚唔夠飽。」




唔係守株待兔，係獅子撲兔…
Q：「我出門口喇，你今晚乖乖返工呀，bye。」
QQ講完就滿心歡喜咁出咗去，有個契弟請佢食好嘢係人都開心啦；女神就去拍拖，鋸扒，我就去返工，呢個乜世界嚟？夠晒唔公平，哼！好在我都有Angel姐姐陪我，等我唔會悶到驚企喺度都瞓得著而走去背餐牌。
咦，唔係喎，前日有個酒樓姨姨畀咗兩張大家樂咋咋淋鐵板餐減十蚊券畀我，咁我都可以去鋸扒㗎喎，折完之後都係貴過焗飯少少啫；呢啲虛有其表嘅黃色招牌餐廳得閒去食下都唔錯嘅，味道至少都好過紅色招牌嘅美心。
然後我竟然好乖咁喺屋企做功課，上床攤下，開電腦揸下貨櫃車，去陽台幫QQ收衫瞻仰下佢啲底衫褲…怐到八點落去諗住鋸完扒就返工。
點知一入大家樂。
蚊：「Hi，交叉仔。」