為了實現媽媽遺願，我成為了女兒國唐僧: 271

今晚放工返到屋企發現QQ已經上咗床瞓覺，飯枱上面就有一本寫到密密麻麻嘅單行簿，我搧咗下見到已經寫咗十幾頁…女人真係黐鬼線嘅，平時要我寫一頁功課我已經想死咁滯，而佢短短兩日就寫咗咁鬼多字…唉，我真係要勤力啲至得。
本來想睇下佢寫咗啲乜，但既然佢講過話怕醜唔想我睇，所以我就冚返埋算數嘞；當日我都唔想佢攪我本週記，將心比己，我而家都唔應該偷睇佢寫嘅嘢，我同佢嘅關係未至於可以隨便窺探對方嘅私隱…同埋私處。
到咗第二朝起身。
我：「咦，Queenie早晨，妳重喺度嘅？」
Q：「重早晨？你望下個鐘而家幾點！」
無乜時間觀念嘅我，屋企當然唔會掛個圓型大鐘上牆啦，所謂嘅鐘只係一部藍牙喇叭鬧鐘上面幾粒好細嘅數目字；其實呢，平時都係睇電話多㗎喇，呢個年代鐘同錶已經係一種過時嘅物品，除咗Apple Watch之外。
我：「哈哈…原來已經成點鐘，不過差唔多啦，我放工返嚟都十二點幾。」無講嘅就係我上床之後打傳說打到三點幾。
Q：「你日日都咁樣，到返學嗰日你就知死。」
我：「到時先算啦，係呢，妳又話去拍拖嘅？」
唔通鬧架，甩底？




Q：「約咗四點呀，人哋星期日而家家庭樂緊去咗飲茶，你估好似你咁日日無所事事咩。」
我：「都唔係好無所…呀，係嘞，咁妳食咗嘢未，會唔會餓死咗？」
Q：「等得你嚟就梗係死咗啦，所以我已經蒸咗蝦餃食，同埋食咗個蘋果。」
我：「夠唔夠，使唔使我再煮多餐？」
Q：「唔使喇，你食自己得喇，我留返個肚等今晚嗰餐食好啲，你話per head二百蚊到食乜好呢？」
係，我知，我要食自己，妳就去食條仔。
一分耕耘一分收穫呀！女神妳去含腸吧啦！
我好想咁樣同佢講，如果我唔怕死嘅話，不過我諗佢都唔介意嘅，含住心愛仔仔條腸應該都好幸福，正如我覺得做大卡車條走狗好爽一樣。
（有無人想睇交叉仔外傳？超甜故：我被大卡車在床上輾過的故事。想嘅可以偷偷留言，不過我都係唔會寫。）
我：「唔好玩我啦，我幾可會食到二百蚊一餐呀，除咗任食打甂爐，放題燒肉，雞煲呢啲。」




呀右女神，妳其實有無諗過呢，如果晚晚食兩嚿水，一個月已經唔見咗六千喇！夠我呢間屋交三個月租有多，試問有邊個學生可以孭得起呢條數…
Q：「咁新年佢有利是收㗎嘛，係咪先？所以咪要食好啲囉，一餐半餐啫，又唔係日日都係咁。」
妳係咪唔記得情人節呀？呢度又要一餐好㗎啦，重要送禮物畀你，我都戥佢可憐，睇怕就算中產小朋友都會唔見咗一大截利是錢；所以…妳咪要日頭去肉償人哋囉，實質同互相傷害無乜分別，呢個世界其實都幾公平吖。