thriXt Qantasy 純文字安眠之作 (New: - U2K - 一直上架): 260

Q：「好似排第一就可以有每日十蚊。」
我：「十蚊…妳攞部琴去商場門口彈都唔止啦。」
Q：「你估我唔想？如果俾熟人見到點算呀…我唔可以俾人知道我淪落到喺街頭賣藝㗎。」
係嘅…QQ叻女又靚女，多才多藝，如果拋過身出去博應該都會好值錢，但世人嘅眼光絕對係一道冷酷無情嘅障礙。
我：「嗯…睇嚟我應該去學下拋波，或者心口碎大石。」
Q：「咪傻啦，你已經要去酒樓打工，邊有咁多時間喎。」
我：「講笑啫，但係十蚊雞做到啲乜。」
Q：「差唔多夠我食到每日一包蝦餃！」
到底呢個女仔有幾鍾意蝦餃…實在係太深不可測，為咗食蝦餃而寫小說真係聞所未聞，令人五體投地，但我又覺得佢好鬼死可愛。
我：「每日一包…我都重勉強負擔到嘅。」




Q：「唔想你咁辛苦吖嘛，我想用自己錢買嚟食，到時我哋就可以一人一包！」
到底佢係咪對我有時會食咗佢兩三粒而懷恨在心呢？明明又話怕肥豬豬，但就係成日都臨瞓前食晒成包蝦餃，我都係為妳體態著想咋；不過如果妳肥咗我又無乜所謂，最好肥到俾條仔飛，就算妳肥多一倍都好…都係唔好，講過，修改做三份一啦，我都會繼續深愛妳，到時就可以攬住妳嘅溫香軟肉，不停咁搓弄，愛妳，愛妳，深入咁愛妳，乜都畀晒入去咁愛妳…
我：「妳可以試下嘅，但有無咁易攞第一呀…」
Q：「哼，唔好睇小本小姐，你知唔知好多出名嘅網絡作家其實都係學生嚟㗎咋！同埋重有第二個小說網，可以整啲plan畀人訂閱，兼且有得課金添，就等我話畀你知點樣可以用枝筆嚟變錢！好，我而家就去研究下，順便諗個故事大綱出嚟。」
QQ的書中自有黃金屋，我的屋中自有顏如玉；只要我哋重喺同一間屋，我就已經感到無比幸福，可以睇到妳笑，睇到妳扭蝦餃食，睇到妳沖完涼嘅軀體，我再別無所求。唔知，QQ寫出嚟嘅愛情小說會係點嘅呢？雖然我從來都唔睇呢樣嘢，但如果係右女神嘅作品我又好想八下。
結果呢晚佢食完蝦餃就匿埋喺自己張床上面度橋，QQ，我支持妳，妳要畀心機！