為了實現媽媽遺願，我成為了女兒國唐僧: 259

Q：「妖！加多條原味底褲囉，好未？！你哋啲男仔真係好唔浪漫，係要搞到件事咁污糟。」
我：「OK，我代阿健表示收貨，不過點畀佢？」
Q：「寄咪得，呀！唔好，萬一佢屋企人拆咗就大檸樂。」脹卜卜一封信，又真係好想拆。
我：「咁妳諗住點？」
Q：「嗯…暑假搵一日約佢出嚟，喺商場度等，然後佢到咗我就message佢叫佢開某一格商場locker，封信同佢想要嘅嘢已經放咗喺入面，信開頭就寫，親愛的『絕塵逍遙君』，喺你睇到呢封信嘅時候，我，Kuromi已經身處香港機場禁區…下刪一千字…所以，我哋都係唔好見面，對唔住，祝你以後生活愉快，再見。搞掂！」
我：「妳寫到咁浪漫，又真係唔襯條原味底褲。」
Q：「咪話咗你，係要搞壞個意境先安樂，鍾意一個人，唔係為咗要J佢㗎！」我錯囉，右女神…
我：「唉，睇完封信，咪盞佢更加鍾意妳。」
Q：「更加鍾意都無所謂嘅，唔好有無謂希望就得，咪留存呢份心意喺心中。」
我：「咁樣…真係好？好似好sad end。」




Q：「咁無其他辦法吖嘛，心入面多個鍾意嘅人都好嘅，點都開心過心入面多個唔鍾意嘅人，係咪？」佢非常有自信咁望住我。
係嘅，曾經我都嬲過細蚊無端端消失，嗰排唔安樂咗好耐；但到咗而家，雖然我哋應該唔會有機會喺返埋一齊，但我都重係鍾意呢個女仔嘅，亦明白咗佢當時嘅委屈，成個人就舒服晒；縱使有緣無分，都會珍惜生命之中曾經遇到對方，重互相交換咗大家嘅第一次…
我：「如果佢知道真相嘅話，恨妳一世都似。」
Q：「我呢啲叫善意的謊言，可以使人幸福，呵！」
我：「Queenie妳唔去寫愛情小說真係嘥晒…」
Q：「使乜講！小女子我才華橫溢，詞鋒銳利，感情細膩，描繪真緻…乜話！你啱啱話寫愛情小說？！」
我：「係呀，妳呢啲唔係愛情小說橋段嚟咩？」
Q：「點解我諗唔到？！我可以寫小說搵錢㗎喎！」
我：「吓…乜年代呀，唔係話啲書商出一本蝕一本嘅咩，好似得返啲大作家同教科書有錢賺。」
Q：「乜年代呀！重印書？嫌地球太多樹要斬多啲咩？我之前上過個網絡小說網，記得話如果篇文受歡迎上到排行榜十大係會有錢收㗎！」




我：「咁巴閉？可以有幾錢呀？」