為了實現媽媽遺願，我成為了女兒國唐僧: 261

第二日，星期五，晴天，上班日。
Q：「起身喇！起身喇！交叉仔起身喇！」
我：「呵…嗯…搞乜鬼…女王…」
Q：「就嚟中午喇，起身做功課呀。」
我：「使乜咁急呀，重以為妳肚餓添…」
Q：「都就快㗎喇！你起身做功課先啦。」
我：「過埋初三先做都唔遲啦…肚餓再叫醒我。」
Q：「唔得呀！我諗緊點寫小說，鬥志好高昂呀，你都要起身陪我，唔準咁懶！」
睇嚟我都係無得反抗，明明就話唔會影響對方嘅生活，事實係邊有可能吖…但為咗妳，一切也願意，反正功課遲早都要做，所以我就乖乖爬起身，擦牙洗面然後坐喺QQ隔籬，當然做我最鍾意嘅計數先…係咁㗎啦，唔通做作文先咩。
Q：「快啲做晒功課先咪好囉，你重要返工㗎。」




我：「都係夜晚幾粒鐘啫，無乜大影響嘅。」
QQ攞住本單行簿喺度寫寫寫，個樣又真係幾認真㗎喎，我計完幾條數佢已經寫滿半版紙；呢刻嘅佢係文學少女，彈琴嗰陣係藝術少女，做K生個女嘅時候係有錢皇帝女…其實我哋兩個嘅生活本來就南轅北轍，佢食佢嘅文華廳，我食我嘅便利店，大纜都扯唔埋，我都無諗過要接近佢，估唔到嘅係當我哋被迫住埋一齊又可以咁和諧。
呀，可能因為一樣嘢，我同佢喺某方面係有共通點嘅，就係喺嗰啲事情上面會比較曳曳。
Q：「喂！咪䚎我寫啲嘢呀！專心做功課。」
我：「你摷醒我嚟陪妳，但唔俾我睇妳寫咩？！」
Q：「我係咁霸道㗎啦！我怕醜就寫唔出…」
我：「都黐鬼線嘅…妳同男朋友謦電話，再做埋嗰啲嘢又唔見妳話怕醜？」
Q：「點同喎，嗰啲係現實關係…而愛情小說就係…總之唔同啦！到我成功咗先再畀你睇啦。」
我：「唓，都唔知有乜咁矜貴，愛情小說來來去去都係咁㗎啦，呢個溝下嗰個，嗰個搶下呢個，呢邊鬧完架，到嗰邊喺度曳曳，happy end就喺城堡入面王子公主幸福生活，sad end咪分手收場。」
Q：「所以咪話你哋唔明！」




嗯…文學嘅嘢我識條鐵咩，都係唔好騷擾佢…
結果呢一日我哋繼續日常，直至到我返工。
其實返工都已經變咗我嘅日常，無乜好講，但今日竟然有啲嘢係唔同嘅，除咗比平時更加忙之外。
「唔該三枝藍妹！」
「係！麻煩等一等！」
三枝藍妹，好啦，就等我幫下手先；於是乎我就攞咗個冰桶插咗三枝藍妹入去行埋張枱度。
「喂！靚仔你搞乜鬼呀？！」
我：「唔好意思…請問係咪我聽錯咗？三枝藍妹…啱唔啱？」我無理由聽錯喎…點解要鬧我…
「屌！」點算好…我完全唔知自己衰咩。
「Sorry！唔好意思！嚟喇嚟喇！等我幫幾位大哥斟酒呀！大家飲得開心啲！」有位姐姐埋嚟謝罪…




我好似意識到自己衰乜，然後勁尷尬咁行返埋去個standby位度，等下一台客人埋單走人。
「傻嘅咩你！有啤酒妹喺度你唔可以幫手派酒㗎！」個啤酒妹『姐姐』斟完酒行咗埋嚟同我講嘢。