為了實現媽媽遺願，我成為了女兒國唐僧: 258

Q：「咁就應該係經雙方家長同意之後，未夠十六歲都可以做先啱，又唔係偷呃拐騙。」
我：「咁妳問下妳媽咪意下如何…」
Q：「我諗我扭下計佢真係會扤頭，佢嘅話。」
妳媽咪係啫，我媽咪已經無機會扤頭；呢個世界就係咁奇怪㗎啦，奇怪到我返工就合法，喺屋企就叫獨留在家兒童，睇嚟屋企先係一笪最危險嘅地方，因為獨留嘅話…就會唔小心帶妹妹仔返屋企做愛，唔信你問下QQ條仔係咪吖。
Hea咗陣就到八點，我上線搵咗阿健先，佢堅持要等到Kuromi出現先開局玩，因為唔想要Kuromi等我哋完場先可以再開；咁…其實佢係出賣緊我嘅，因為我要陪佢喺度等女，佢都算係有異性無人性嘅佼佼者，但作為一個理解佢好想溝女心情嘅朋友，我對佢行為表示明白。當然現實係Kuromi坐咗喺我隔籬特登前後腳入game，大概八點二左右佢就出現喇。
細節就唔講嘞，爛作者同我講過呢篇唔係網遊小說嚟，佢無咁多時間用數據流嚟呃字數浪費大家嘅時間，重叫我唔好太沉迷遊戲喎。
結果我哋今晚三個一齊由頭打到落尾，用兩個幾鐘打咗十場有多，升咗三粒星帶挈我同QQ都上咗一小段位，臨尾阿健又送咗個skin畀QQ；一齊三排打上去都幾熱血嘅，但阿健就實在係無乜收穫喇，Kuromi雖然有同佢謦欬，不過都係兩句起三句止，而且我聽得出防守性好強，背後嘅意思都係叫你乖乖洗洗睡唔好諗埋啲無謂嘢，不要存有一絲希望。
而我睇怕阿健呢個傻仔係唔會放棄。
我：「真係好，又有skin收。」
Q：「唔好咁講啦，又唔係我迫佢送嘅。」




我：「妳不殺伯仁，伯仁卻為妳而…唔講嘞。」
Q：「哎呀，你估我好想咁咩！但我已經諗到辦法解決呢個局面。」
我：「係？Kuromi妳有乜高見呀？」
Q：「嗱，我最多拖到今年暑假嘅啫，如果佢放棄就最好啦，咁我就乜都唔使煩；但係如果佢堅持嘅話，我就會同佢講我全家要移民，所以都係唔好見面喇，然後寫封親筆信畀佢咁啦，之後就block咗佢，我諗佢都會理解佢嘅苦心。」
我：「俾妳玩半年換嚟一封信。」
Q：「乜喎，我啲親筆信好值錢㗎，你都無啦。」
我：「親筆值錢，嗱，我就準備沒收妳本週記做妳嘅房租㗎嘞，到時我未有囉。」
Q：「畫多隻傳說角色嘅公仔畀佢囉。」
我：「咪又係多幾筆。」
Q：「最多，加埋個唇印喺信紙囉。」




我：「阿健…你好慘呀，嗚嗚嗚…單靠一個唇印嚟J，真係教人聞者心傷，聽者流淚呀！」