為了實現媽媽遺願，我成為了女兒國唐僧: 217

IFC有乜鋪啱中學生行？呢個簡直就係百萬富翁入面嘅最後一條題目嚟，當然如果你係富二代就另計啦，好似兩個月前嘅Queenie咁…食嘢就反而呢度都重有得食，我堅唔明點解M記喺呢度重可以生存到，貴少少都可以用六七十去乜乜M食件貴婦蛋糕，正斗食碗粥，新潮漢堡，三文治，咖啡諸如此類…
我：「咦…呢個標誌咪妳個包包…」
就係嗰個由幾條曲線構成嘅正方形，初頭睇落似係啲古文明魔法陣覺得奇形怪狀，但後嚟越睇就越覺得順眼，有種藝術性嘅規範美。
Q：「哎呀，咪Loewe嚟囉，有乜好睇呀。」
我：「但妳唔係好鍾意嘅咩，咁多袋係救得返呢個出嚟。」
Q：「鍾意又點喎。」
我：「入去睇下囉，見到自己鍾意嘅嘢都開心。」
Q：「唔開心呀，又唔會買嘅。」
我：「等我知道有幾貴都好吖。」
Q：「咪就係好很貴囉，我唔要心理唔平衡呀！」




我：「會有幾心理唔平衡呀？」
Q：「就好似日日對住你咁心理唔平衡。」
我：「咁…妳係咪好唔想對住我？」
Q：「唔係，我講下啫…」
我：「不過呢，我見到啲自己鍾意嘅嘢唔會唔平衡㗎，我次次經過沙田都會入去間LEGO store度睇好耐，去佢個箱度執啲人仔頭身腳砌返十隻八隻排喺條邊度，不過就一次都無幫襯過，明明一隻人仔都只係三十蚊，哈哈。」
Q：「咁點同，嗰啲係買得起，只不過你唔亂咁使錢啫，而唔係無可能吖嘛。」
我：「哈哈，但我覺得我啱啱已經食咗籠無可能嘅蝦餃，唔係妳我諗我呢世都唔會食到。」
而且係拖住一個無可能嘅靚女去食，唔係佢落難，唔係我咁好彩一個人霸住間公屋，我呢世有機會同右女神做朋友嗎？沒有，一掉位就形同陌路啦。
Q：「係你先好意思成個小朋友咁去滾攪人哋，況且你實知道有其他地方賣得平好多。」
我：「咁又係，我覺得喺專門店度買嗰啲人係傻㗎，明明出面就係七折左右。」




Q：「唉…好多人唔志在嗰一百幾十㗎；不如，我賣走個手袋等你換幾盒LEGO嚟砌。」
我：「梗係唔得，咁樣我會心理唔平衡。」
Q：「吓，有玩具玩都唔平衡？」
我：「我屋企攞嚟放女神，女神就要似返個女神樣，同埋我屋企無咁多位，唔需要放LEGO裝飾。」自從QQ嚟咗我屋企，陽台已經變咗一個藝術品櫥窗，得閒望住掛喺出面嘅胸圍底褲，就會會心傻笑，重邊得閒去理我啲LEGO。