為了實現媽媽遺願，我成為了女兒國唐僧: 218

Q：「服咗你，我開始覺得你個人好唔平衡。」
我：「咁你條仔望到你個手袋會唔會唔平衡？」
Q：「會㗎…佢知自己送唔起，或者唔捨得，所以同佢出街我都會盡量用返佢送嗰個。」
我：「唉，做人真係麻煩，要顧咁多嘢。」
Q：「有無諗過如果有一日你變咗做富二代你會點？」
我：「嗯…咁就買乜都得，不過買再多LEGO都無咁多時間砌，買game都玩唔晒，好似會好攰。」
Q：「細路仔就剩係識諗玩…」
我：「可以日日嚟食蝦餃囉，不過日日食都會悶，同埋，要同妳一齊食先會開心。」
Q：「咁係咪要買埋個女神放喺屋企？」
我望住佢擰擰頭。




我：「如果我係富二代，我讓個爸爸媽媽畀妳好啲，我都唔識做富二代嘅，留返畀妳呢啲專業嘅嚟。」
Q：「睇嚟你真係好驚俾人管住。」
我：「係咪可以亂使錢都唔俾人鬧先，如果妳日日扭K生帶妳嚟食蝦餃得唔得？」
Q：「梗係唔得啦，做錯乜都俾人煩死。」
我：「咁咪係囉，而且妳想食嘅芒果布甸都無得食，但係妳今日同我嚟有得食喎。」
Q：「好彩咋嘛，都唔關你事嘅。」
我：「但至少我重可以令妳日日都有公仔蝦餃食。」
Q：「得喇，知你對我好…」
我：「咁妳而家喺我度住得慣唔慣呀？」
Q：「幾好吖，都無乜問題。」




我：「我好驚妳唔開心㗎，生活環境咁大改變。」
Q：「咁都有好多好嘅改變嘅。」
我：「吓？咁無人想做有錢女啦。」
Q：「例如學校喺屋企對面，可以瞓多廿分鐘。」
我：「叫K生搬屋囉。」
Q：「我唔使再喺琴行彈莫扎特舒伯特李斯特，自己鍾意彈乜就乜，好似鍾意彈琴咗。」
我：「唔係妳屋企要妳彈琴，妳點會而家可以彈乜就乜。」
Q：「重有一個比K生更縱我嘅男人。」
我：「睇嚟係我嘅錯，咁妳以後每晚彈莫扎特畀我聽啦，彈完先有蝦餃食。」
Q：「你識鬼，我彈緊乜你都唔知啦。」




我：「彈登登登凳咪莫扎特囉。」
Q：「嗰個係貝多芬嚟呀！」
我：「咁呀…彈數碼暴龍啦。」
Q：「Butterfly？好老餅喎。」
我：「經典嚟吖嘛，咁鬼滅囉，好未？」
Q：「鬼滅難彈好多呢。」
喺一個無嘢行到嘅商場，我同佢拖住手謦欬，已經係一個好愉快嘅節目；每一次拖住，同佢嘅距離就好似突然縮咗好多，乜都可以講，又唔使理會關係嘅束縛。
行下行下就出咗IFC，喺中環有乜可以做呢？我好想可以繼續拖住QQ周圍行，唔想返屋企住，因為返到去又會一切都打回原形，無咗呢種拍拖嘅感覺，但我總唔可以漫無目的咁同佢行，點都要搵啲節目嘅…AIA嘉年華？好燒錢，去都夜晚先去玩摩天輪啦；搭纜車去山頂？去到應該都無乜嘢可以做，有排先等到日落，又唔可以同佢偷情…
Q：「我哋不如去搭船咯？」
我：「K小姐想搭天星小輪去尖沙咀？」
Q：「我唔係K小姐呀！搭除咗去尖沙咀嗰架。」
即係點？離開咗酒店，離開咗IFC，我覺得佢又由K生個女變返做一個麻煩細路女。