thriXt Qantasy 純文字安眠之作 (New: - U2K - 一直上架): 216

Q：「哈，你個唔識食嘅細路仔，早知唔留畀你！」
我：「你咪唔好留囉，妳呢個獨食難肥嘅細路女！」
Q：「呵，我當然唔肥，係窈窕嘅淑女。」
我：「係難服侍嘅K小姐就真！」
Q：「唔同小朋友鬥嘴，我食核桃酥。」
其實，我食過最好味嘅芒果布甸要數返去十年前，無任何生果，只有羅拔臣啫哩粉，鮮奶同埋雞蛋…成大兜沉甸甸每一口都係甸嘅感覺，加埋極重嘅小朋友香料味。
只可惜，我呢世都唔會再有機會食到…
美點雙輝做得非常好，核桃酥新鮮香脆，應該係每日即焗，而個桂花糕更加係好味到難以置信，入口生津，令人心曠神怡。
而我哋兩個就繼續喺文華廳坐多陣，欣賞呢度嘅美好風光，愜意咁飲埋我哋嗰兩杯茶，雖然啲茶葉已浸到無乜味。
大約點九左右，其他人開始離開，我哋都係時候埋單，待應姐姐攞咗張單嚟比我望一望，然後我就喺銀包攞咗大拿拿六百蚊出嚟，我諗…呢度都無乜其他人會用現金找數，諗諗下其實佢應該會收EPS咁我就可以擦卡？不過算啦，橫掂都已經㩒咗出嚟。




錢，還是要找的，找返嚟夠我買三包公仔蝦餃。
知：「多謝晒，期待兩位下次嘅光臨。」
我：「嗯，我哋會再嚟。」我向知客姐姐點頭。
跟住QQ拖咗我去搭（車立）。
Q：「哎呀，你答佢做乜喎。」
我：「因為我真係諗住再嚟。」
Q：「吓…你講真呀，唔想你破費喎。」
我：「以後我哋就每年都嚟食一次開年飯啦！」
Q：「哈…你即係話我以後無屋企返嘅啫。」
我：「呀…咁食到妳有屋企返為止囉。」




Q：「傻瓜，如果係呢度嘅話，你約我我又點會唔嚟喎。」
我：「其實，妳都可以叫你條仔帶妳嚟食㗎。」
Q：「唔好喇，太貴，費事睇到佢愁眉深鎖茶飯不思個樣，影響我食慾。」
我：「咁唔好嗌咁多咪得，好似咁樣食少少都好開心吖，樣樣嘢都好好味。」
Q：「你唔明，男人係好麻煩。」
我：「妳做乜講到我好似唔係男人咁。」
Q：「點同，你惜我吖嘛。」
我：「你男朋友唔惜妳咩？」
Q：「咁又唔係…總之係有分別啦。」
其實我都唔係好知佢同條仔想點，我所知嘅就係時不時send message，夜晚就煲下粥謦電話有時做到色色嘅嘢，放假夾到時間就會去送外賣，再去玩同飲飲食食，過時過節會有禮物收…計落計落佢每個月都會鋸走條仔千零兩千蚊到，條仔自己都要食，即係為左同QQ拍拖每個月要使成三千蚊，嗯…咁對一個中產嘅小朋友嚟講都唔係一筆小數目，但，佢係QQ嚟喎，點都抵過搵PTGF。




呀…我唔應該諗埋啲無謂嘢，佢條仔未至於衰到為咗佢嘅身體而課金嘅，好歹都拍咗年幾拖。
咁其實如果我成份糧用晒畀佢，一個月都二千有多…
我：「係呢，Yvonne佢哋會唔會同妳嚟呢啲地方食嘅呢？」
Q：「呢度，係有啲over咗，講就講咗好多次，成日都話要去clipper lounge食佢low table tea個scone，希望唔好成事，兩人set七百幾蚊，就算三個人分都唔平，而且我食過唔覺得好味到上天…平時，我哋咪會去商場入面靚少少嘅cafe都有afternoon tea食，百零蚊囉…」
呢個，亦都係我必需要搵錢嘅理由。
飲完茶，雖然唔係好飽，但我哋兩個都好開心，拖住手行下行下就行到去IFC；上次除夕送完QQ唔知做乜自己走咗過嚟，結果咁快就同佢再次嚟到呢度，難得出到嚟中環無理由唔行下㗎。

（喵按：各位讀者無訂位鏟上去食閉門羹唔好同我講；蝦餃講啲蝦啱唔啱季，師傅好唔好心情，食唔到心目中質素唔關我事；冬天唔係芒果季會cut餐單，呢度純粹杜撰，更唔好幻想小朋友去食會有優惠，有special service嗰啲九成係課到同總廚係半個朋友嗰啲嚟…）