為了實現媽媽遺願，我成為了女兒國唐僧: 215

「K小姐，放心啦，係我哋經理請兩位食㗎，請慢用。」侍應姐姐非常禮貌咁同Queenie講。
Q：「多…多謝。」
哈哈，QQ又多個名，等我得閒無事又可以嗌佢做K小姐玩佢…K小姐，呢個名真係好正。
美點雙輝，其實就係核桃酥同埋桂花糕，咁呢兩樣嘢就普通酒樓飲宴都經常會見嘅，唔係啲乜特別嘢，當然呢度個樣就望落都正好多啦。
另外就係一杯芒果布甸，都幾大杯下，用一隻高腳闊口嘅cocktail杯做容器，淡橙色嘅芒果布甸上面重有幾片鮮芒果，半粒士多啤梨，一塊薄荷葉，加一壼仔淡奶，論樣已經贏晒普通酒樓嗰啲。
Q：「我終於…可以食到呢樣嘢。」QQ望住布甸講。
我：「好難得嘅咩？我頭先睇到餐牌都只係九十幾蚊一杯啫。」喺酒樓返過工，對餐牌都會敏感啲，所以頭先一䁽就望到布甸嘅價錢，話晒我平時都有機會攞返嚟畀QQ食吖嘛；九十幾當然唔平，但相對大部份都係三位數嘅食物嚟講，呢樣都算係小朋友可以嗌得落嘅選擇嚟。
Q：「無呀，老竇叫我唔好咁細路女，所以次次都唔幫我嗌，而且食到尾都已經飽咗。」
我：「K小姐，妳而家大個女喇，可以自己嚟食。」
Q：「哼，X先生，無你出糧我都無得食呀。」




總覺得，我哋兩個嘅距離近咗；雖然我係養唔起佢，但至少我哋可以用少少錢嚟一齊做啲開心嘅事，唔使日日屈喺屋企入面。
我：「重講，快啲食啦，攤到熱晒喇。」
然後QQ就攞咗杯布甸放喺面前，用手夾住士多啤梨粒蒂，再咬入口中，呢個動作真係好鬼性感；食完粒士多啤梨佢就攞起壼淡奶慢慢倒落去，再用匙羹潷起啲布甸同芒果肉一齊食；睇到佢開心個樣，我就覺得自己好幸福。
當然，如果我放工有芒果布甸攞返屋企喂佢，我都會非常幸福。
一個布甸兩個人分，所以侍應都畀咗兩隻甜品羹畀我哋，咁我當然就等QQ食完先自己試啦，如果呢個為食女肯留返啲畀我嘅話；點知，佢就直接用佢隻羹潷咗一啖放喺我面前。
Q：「呀…」
我擘大咗個口放入口中…附近當然重有其他食客而且都睇到，但既然QQ想放閃我就唯有配合佢啦，希望唔會打攪到其他食客嘅雅興。
吞到落肚，我又諗返起嗰條被分屍嘅瀨尿蝦，同埋QQ惜我嗰陣，我…好想，啜佢條脷入我口度。
最後QQ食剩個底就成杯推咗嚟我面前，作為細路仔嘅我當然倒盡每一滴淡奶落杯布甸入面，再繼續放QQ食過隻匙羮入口，直至刮到隻cocktail杯變返透明為止。
Q：「點呀，好唔好味呀？」




我：「嗯，好好味，啲芒果肉都好甜…但係，啲布甸落得太多果肉，無乜甸嘅感覺。」