為了實現媽媽遺願，我成為了女兒國唐僧: 207

我：「去食燒肉好唔好？」
Q：「燒肉放題？」
我：「係呀…放心，我唔會去太平嗰啲。」
所謂太平，就係我同阿健呢啲乜都無所謂，可以係咁將劣食擺落個肚，以前間唔中儲夠零用錢就會去食一餐嗰啲；試問QQ佢食開十幾廿蚊一條腸，又點會陪我癲去嗰啲百零蚊落樓嘅韓燒店食。
Q：「放題…你係咪好想塞肥我啫？唔係幾好。」佢一路摸自己個肚仔一路講，明明佢自己好鬼死為食，但偏偏又要忍住唔去呢啲地方。
我：「咁…如果係雞煲呢？」
食雞煲佢可以剩食雞肉唔會太肥，我就狂啪白飯同紅薯粉，各取所需諗落都唔錯。
Q：「但我啱啱先同啲八婆食完炸雞，我唔想塊面生粒粒呀…」
俗語講得好，你放進肚子的東西如何，你的樣子也必如何，作為一個貪靚嘅港女仔，喺食上面絕對係一場戰爭；一係食，一係靚！魚與熊掌，不可兼得！
我：「妳哋食完KFC？」




Q：「唔係呀…係韓式炸雞…」
嗯，睇齣戲起碼五六十，韓式炸雞…我諗細食都要六七十蚊，的確KFC又襯唔起佢哋身份嘅。
Q：「我都知我嘥你好多錢…如果你擔心，不如我哋聽日留喺屋企食算啦。」QQ喺度㧻手指。
我：「咁點得，我而家識搵錢，唔會有問題。」
Q：「你話事啦，我會盡量慳。」
其實我知佢已經好慳，但我總唔可以叫佢慳到連班八婆朋友都無埋，正如佢要我溫書都唔可以迫我鏟埋隻game。
我：「一係食壽司？」我已經諗到唔識諗。
Q：「但天氣凍冰冰，同埋壽司夜晚去AEON買都得啦。」
港女本色，就係食乜都話唔係幾好，但就偏偏要你諗，而嗰啲M記譚仔我真係講唔出口…唔通去嗰啲cafe食沙律草咩，對住我佢又唔使扮兔仔嘅；咦，佢又唔係我條女，我做乜要扮到有心思咁，直接問佢咪係囉。
我：「其實妳有無嘢想食？」




Q：「蝦餃。」佢眼仔轆轆水汪汪望住我，煞是可愛，呢一刻我絕對唔覺得係港女，而係我細妹。
我：「妳想去我公司飲茶？」
雖然有啲怪，唔知會點呢，馬叔叔係咪會去執碟最靚嘅油雞髀半肥瘦叉四寶飯畀我？想試下添…
點知QQ佢擰擰頭。
我：「妳唔係話冰箱嗰兩包呀？」
十一蚊一包嘅公仔蝦餃，已經變咗QQ嘅常規零食，算係盡我所能平時可以滿足到佢嘅食物。
Q：「你唔記得我本週記喇咩？」
我：「文華…東方？」