為了實現媽媽遺願，我成為了女兒國唐僧: 208

Queenie佢點點頭。
我：「會唔會好貴？」
呢間我真係驚呀…大佬，雖然我無去過，都知文華東方係香港五星級酒店中嘅地標，另外嗰幾間，睇怕就係半島，四季，同Ritz Carlton；唔好問我一個中三平民學生哥點解知，喺嗰個控制我呢個悲慘人生嘅仆街爛作者話我知嘅。
Q：「都唔會嘅，晏晝去飲茶啫，又唔係去食晚飯，食三四碟點心就得㗎喇，我諗同你夜晚去食燒肉放題差唔多。」
我：「妳好想食嗰度嘅蝦餃？」
Q：「係呀，以前同屋企每年都會去幾次，同埋…我同你，就係因為本週記先變到而家咁熟，如果可以，都想同你食一次，將個好味分享畀你。」
QQ，聽到你咁講，我實在係好開心。
我：「好啦，咁聽日就同妳去文華東方飲茶啦！」
Q：「嘻嘻，多謝交叉仔！」
結果，我成晚都諗住約咗Queenie，要同佢去飲茶，食蝦餃，同埋周圍行下，就好似期待緊聽日可以同準備表白嘅初戀情人見面咁，一直到瞓落床個心都重係咁激動；但明明QQ就喺我間屋入面飛住釘走來走去，呢種反差實在太奇怪，好似聽日嘅佢先係佢嚟咁，而而家眼前呢個QQ只係一個幻像，我都唔識解釋，總之我就係好興奮啦。




唂咕，唂咕，傻瓜，傻瓜。
到咗第二日，我哋十點鐘就起咗身，我純粹係因為一醒咗就瞓唔返，懷住緊張嘅心情，準備迎接咁大個仔第一次去五星級酒店呢件大事。而QQ呢，當然係有正經事要做啦，就係翻箱倒櫳咁喺度摷衫，沖完涼就梳頭，然後喺個頭後面織咗兩條短短幼幼嘅辮，再將兩條辮嘅辮尾合而為一，中間嘅頭髮就屈起繞落嗰兩條辮度…
呀！唔識形容呀！已經超越咗我嘅中文言喻能力喇…總知！就係好靚女啦，斯文又得體，平時佢見男朋友都無執得咁企理，估唔到佢今日會…
然後再略施脂粉，搽咗少少桃紅色唇膏，加輕微嘅眼線，今日嘅Queenie，實在係貨真價實嘅女神嚟！原來女仔勤力少少，係可以有咁大改變！
Q：「喂，你唔好眼甘甘望住我等開大餐咁呀，我只係配合返個地方先扮靚㗎咋，唔係為咗你㗎。」
我：「咁…我使唔使做返啲乜？」
Q：「唔使啦，無人得閒理你，你企理啲就得。」
就係咁，我睇住QQ喺我面前著咗條白色嘅連身長裙，出面加件深灰色嘅羊毛外套，由於佢只係帶咗三對鞋嚟，就唯有著返佢對粉紅溝白嘅出街波鞋。