為了實現媽媽遺願，我成為了女兒國唐僧: 202

然後星期一放學我就去入支票，原來入票都係用機就得，個職員教我入完提款卡再入票；嗯，都唔係好難，而且幾好玩，唔知幾時會收到錢呢？
到咗第二日返學，返埋今日就有假放㗎喇！各位小朋友讀者繼續捱住先啦，雖然我知你哋現實都係要返學好慘慘豬…
到咗臨放飯中午嘅時候。
我：「qqqqqq…」因為上緊堂比較細聲，所以係細階。
Q：「又點呀…煩膠膠…」
我：「Queenie妳睇下，啲錢入咗戶口喇。」
我打開咗電話入面嘅E-banking App畀佢睇，琴日張850蚊嘅票已經成功變咗做錢出現喺我戶口，亦令到我戶口由五字頭變返做六字頭；小朋友要睇清楚，係個字頭變，而唔係由五位數變做六位數，我無你哋咁幸福，我個戶口係得四位數㗎咋…
Q：「知你出咗糧叻仔喇，咁你想點？」
我：「不如…我哋去食餐好？」
Q：「你想約我去食lunch？」




我：「係呀，得唔得㗎？」
Q：「梗係唔得啦，你傻咗咩。」
我：「原來唔得…」我嘅表情有啲失落。
Q：「哎呀，你諗咗去邊呀？我上堂同你謦欬同你friend，係因為我坐你隔籬咋，你試諗下如果我同你兩個去食飯會點？俾人見到實有排講啦，一係就話我收你兵，一係就話你配唔起…哎，我都係為咗我哋好咋，如果引起其他人留意就好麻煩，你唔好唔記得我哋嘅秘密唔可以俾人知㗎，如果唔係我收你做兵算啦。」
我：「嗯…我明嘅，一時興奮得滯啫。」
即係話我連做兵嘅資格都無，兵都不如。
Q：「聽日放假吖嘛，咪聽日先去囉，好唔好？」
原來…我唔係兵都不如，而係我根本就唔需要做兵就可以同女神親近！無錯，我起碼都係宦官，一個可以幫貴妃侍寢嘅奸臣，經常可以親近到佢嘅肉體，一親芳澤，大飽眼福，而且重唔使切雞雞做公公，唔通QQ係再世建寧公主？而且佢重好變態一樣會除人條褲打屁股，如果可以，呢世我一定要報仇一次…
健：「喂，做乜發呆咁呀？問緊你開唔開局呀…」
差唔多食完碟飯嘅阿健問我。




我：「唔喇，你上到星耀二，實好難打，上完堂我想抖一抖，唔想太辛苦。」
健：「聽日都放假啦，個個都已經holiday mood，你重有乜嘢煩呀？」
我：「無呀，諗緊新年想食返餐好奬勵下自己啫。」當然，我唔會同佢哋講係同女仔去食飯。
我：「係呢，你哋新年會有乜節目呀？」
健：「可以有乜節目？年廿八咪被迫執屋囉，年三十晚食團年飯…」
康：「年初一拜年，年初二拜年兼探車公，年初四返廣州探親戚，之後咪做功課囉，個個都係咁㗎啦。」
健：「你唔記得咗咩，呢條友自由自在㗎嘛，今年你老竇新年又唔返嚟呀？」
以前講起呢啲話題會有啲唔開心，老竇過時過節唔喺屋企，媽咪又離開咗；不過人大咗，開始習慣就無乜嘢，加上知道佢哋咁講其實無惡意，可能新年要被迫周圍走走糴糴都好辛苦，羨慕我可以攤喺屋企乜Q都唔使做實屬正常；而且今年嘅我，暫時多咗一個屋企人。