為了實現媽媽遺願，我成為了女兒國唐僧: 201

嘩，乜咁搞法呀，Miss Tang係咪明知我同QQ好friend所以惡攪我？唔好呀，我唔要同女神分開呀，我真係知錯㗎喇…
我：「我以後都唔會再兀凳㗎喇，唔使啦。」
QQ見到我成隻死狗咁就即刻喺度暗笑。
鄧：「咁就專心聽書啦，唔好再魂遊喇。」
我：「呀，係喇，Miss，我想問下兀凳兩隻字點寫？」
鄧：「兀凳係口語，寫出嚟即係搖椅子。」
我：「咁兀凳呢兩粒字有無得寫㗎？」
鄧：「你試下考試寫出嚟，我一定唔會畀分你，再問小心我要你罰抄兀凳呢兩粒字一千次。」班上面其他同學聽到即刻哄堂大笑。
唔問囉，鬼唔知係口語咩，都唔知係咪佢唔識寫出嚟所以先咁答我，不過就唔踢爆佢喇。
點知呢個時候QQ佢遞咗張紙埋嚟畀我。




『扤/兀凳/櫈』
Q：「嗱，畀你抄一千次。」
我：「呀，係喇，我認得呢個係凳字，但呢邊呢隻係乜嘢字嚟㗎？」
Q：「你話死唔死呀，一隻中文字得三劃你都唔識，不如返去再讀多次小學啦。」
我：「係Pi？係几？係禿？」QQ一路擰頭。
Q：「作死你呀？禿字上面有一大抽禾字架喎。」
我：「咁咪啱囉，禿鷹禿頭㗎嘛，抽光咗啲毛上面光脫脫咪得返個Pi囉，叫Pi鷹都幾襯吖。」
Q：「食屎啦，呢個咪就係兀凳個兀嚟囉。」
我：「個字咁簡單點解無教過嘅，真係唔寫得㗎？」
Q：「梗係唔係啦，兀凳無人寫啫，突兀個兀咪呢個兀囉，重有岳飛死敵金兀朮，三國演義入面孟獲個老友兀突骨都係呢個兀，兀係指事字嚟，係一個人字上面畫一畫表示頭部，可以解做高聳，可能隻字望落有啲似座山上面有粒石頭，又可以解危石，再引伸做不穩同不安，就好似形容跛腳嘅人行路就會話佢哋兀下兀下。」




救命…QQ講中文字嘅催眠程度可以媲美Miss Tang講書，但我又對兀凳呢粒字好好奇。
我：「咁點解兩隻字都有兩個寫法嘅？」
Q：「呢個用字慣性嚟啫，唔同組合都有人用，櫈係新造字嚟，因為啲人覺得凳用木造咪叫個木部畀佢囉，你可以視乎張凳用乜做而用邊粒字，例如石凳就無理由加個木字落去啦，至於兀，原本多數攞嚟做形容詞，加個剔手邊咪變動詞囉，即係郁動一樣嘢而令佢不穩，呢粒字喺詩經就已經有㗎喇，可以話你扤張凳，搞到張凳兀下兀下。」
我：「點解妳識咁多嘢…妳係咪中學生嚟㗎？」
Q：「唔關事，睇網絡小說學返嚟。」
救命，點解佢煮個米粉都搞唔掂，但就識埋咁多古靈精怪嘅中文字，唔得，我都要專心聽書先，正所謂桃花園有顏如玉，紅樓夢有林黛玉…