為了實現媽媽遺願，我成為了女兒國唐僧: 203

QQ幫我賣廣告：整整一萬字嘅…欸…乜鬼大數據年代擦不上榜的專業作家在哭…好似係咁，終於寫完喇！大家有興趣可以睇下～
（喵按：其實講邪教，傳銷，保險，學店，配對公司，生命導師，乜叉經營團體，飯托酒托，電話/網絡騙子呢啲全部係我專長，但認真文應該無人睇，呵呵）

我：「唔返呀，聖誕同新年都係行船嘅peak season，佢通常都係揀三月返嚟，可以一留就留耐啲兩三個禮拜咁。」
其實我一直都煩緊到我老竇返嚟嗰陣QQ要點算，畢竟十幾廿日都唔係短，我又無可能俾佢繼續留喺度，如果租酒店嘅話兩三日我都重畀得起，兩個禮拜就算每日三百都會攞咗我條命…睇嚟我都係時候要同QQ謦下呢個問題。
我：「不過我應該都會去搵阿婆同舅父食團年飯嘅，係呢，你哋團年飯會有乜好嘢食呀？」
健：「你係咪玩嘢呀，團年飯食乜輪到我哋揀嘅咩，年年都去酒樓食㗎啦，咪又係白切雞，蒸條魚，白灼蝦，咕嚕肉，生菜蠔鼓，悶到發瘟！」
康：「你都好啲吖，我阿媽同阿嬸一齊煮，無希望㗎喇，係碟斬料叉燒同燒鴨會似樣啲…」
健：「乜你哋唔係咁嘅咩？」
我：「我舅父話過時過節啲酒樓專劏客，所以唔食中菜喎，上年我哋去食Pizza，前年就去星加坡餐廳食海南雞，沙嗲，肉骨茶…」




健：「頂，我都想有啲咁開明嘅屋企人，乜你阿婆無意見嘅咩？」
我：「佢OK㗎，幾年前佢乜都食得，湊我嗰陣重會帶我去KFC食炸雞，壽司佢都啱㗎。」
健：「我阿嫲個老竇就係俾日軍炸死㗎喇，如果佢見到我食壽司用筷子shot斷我隻手指都似…」
康：「唉，諗起隻白斬雞就人生無希望，重要次次都蒸到又韌又輆…我懷疑佢哋無味覺㗎。」
我：「原來係咁…重以為你哋新年日日有大餐食會好開心，睇嚟都唔係嗰回事呀下，係呢，阿健你話會去酒樓食團年飯，唔係會去我哋條邨嗰間呀？」
健：「睇怕就係嘞，你都知我阿嫲同阿爺住隔籬邨咋嘛，無謂專登去第二度啦。」
即係，我嗰晚返工會有機會見到佢哋一家大細…咁，其實我返工都無乜嘢啫，又唔係要話埋畀佢知我為咗養女先返工，早啲講定都好嘅，費事佢又成日問我周末夜晚得唔得閒打傳說。
我：「其實…我喺嗰間酒樓打緊工，年三十晚我哋有機會見面嘞。」
點知佢兩個呆咗咁望住我…係嘅，我返完兩個禮拜已經習慣晒，但外人睇起上嚟，一個十五歲細路走去打工，重要喺傳統酒樓的確係幾奇怪。
康：「你喺酒樓返工？」




健：「乜你煮嘢食咁叻㗎？！」
既然佢哋咁多疑惑，都要作個好聽啲嘅原因滿足佢哋㗎嘞，唔係實好似審犯咁問。