thriXt Qantasy 純文字安眠之作 (New: - U2K - 一直上架): 199

Q：「都無辦法，唔通同佢講Kuromi其實係我唔通佢會開心咩，我都唔想俾人憎死。」
我：「妳肯受溝佢咪開心囉。」
Q：「咪玩啦…或者，要等佢痛痛快快受傷一次佢先會學精，唔再喺網絡世界咁多幻想同相信人。」
我：「你咪試下DM佢話跌咗部iPhone無得同佢打傳說囉。」
Q：「哈，你唔去做騙子後面嘅軍師真係嘥晒。」
我：「我從良㗎喇，唔會種大麻，可惜種夏枯草係唔會搵到錢，所以一事無成。」
Q：「如果我真係跌咗部電話你會點？」
我：「拜託千祈唔好發生啲咁恐怖嘅事。」
Q：「咁假如發生咗呢？」
我：「都總會…搵到部電話畀妳用嘅，唔iPhone得唔得？Android都幾好用吖，小米都幾抵，又或者iPhone X，SE咁囉，新機無能為力…」




Q：「多謝喎，唔使咁驚，我會好好保管我部電話，用我僅餘嘅一個Casetify殼嚟保護佢免受傷害，目標係用到考DSE為止。」
我：「嘩，重有三年幾喎，捱唔捱到咁耐呀？」
Q：「咁，三年幾，可能會有個傻仔買部新電話畀我呢？係咪？」
我：「Queenie…妳咁樣望住我想點？」
佢就好似想食咗我咁樣，其實我又唔介意俾佢食嘅，反正佢已經日日蠶食緊我。
Q：「咁驚做乜，我講我條仔咋。」
我：「哦，原來係咁…」
如果買部iPhone畀妳就可以做到妳條仔，我又唔介意即刻去銀行㩒晒啲錢出嚟去買部最低規格嘅型號；但…都係嗰句，我哋重要生活，就算妳做咗我條女，上埋床都好，咁之後可以點，我根本就滿足唔到妳嘅要求。
Q：「不過講起禮物，我寧願收手袋好過。」
我：「嗯，點解嘅？」




Q：「手袋重保值過電話吖嘛，iPhone過三年就唔見七成錢，手袋keep得好又買啱款嘅話，過三年分分鐘攞得返七成錢。」
…嗯…無計啦，貧窮嘅女人係市儈啲㗎喇。
我：「係呢，其實你以前應該有好多包包㗎，但點解我見妳剩係帶咗兩個過嚟嘅？」
咁當然唔計佢個書包啦，雖然佢書包都係靚嘢。
Q：「哈，講起就扯火！第一，我無可能全部入得晒落個喼，第二，我媽咪臨尾嗰兩日攞晒啲值錢嘢去蘇格蘭站賤賣，賣都算啦，明知嗰啲謀人寺鋪頭食咗你隻車㗎嘛，明明去迷你倉租個locker放上網慢慢賣就可以多好多錢！越諗就越火滾呀，真係嬲死佢！」
我：「唔好嬲佢啦…我諗…佢都係臨急臨忙，加埋傷心過度，先一時意氣用事嘅啫。」
Q：「我知呀，講笑啫…嬲佢都嬲唔落，因為佢就係一個從來都亂咁嚟嘅女人，而家嘅兩個包包，一個係我最鍾意嘅Loewe，而另一個就係我條仔送畀我嗰個。」
作為屋邨仔嘅我，鬼知佢口中嘅撈V係乜咩，deep V我就知啫；不過佢既然講得係最鍾意，應該都係價值不菲㗎喇。
然之後就繼續上Miss Tang嘅中文堂。